Ruvdnaprinsa Haakon Stranda čuoigan ja čierastallanbáikkis. Govva: Cornelius Poppe, NTB Scanpix.

Makkár surggiid Ruvdnaprinssa čalmmustahttá

Gonagaslaš Allavuohta Ruvdnaprinsa Haakon gidde stuora beroštumi norgga ealáhusaid ovdánahttimii ja innovašuvdnii. Su beroštupmi guoská maid earenoamážit gründariidda ja ruoná nuppástuhttimii. 2013:s álggahii son SIKT konferánssa, mii čohkke nuorra jođiheddjiid digaštallat boahttevaš Norgga. Sihke Ruvdnaprinsa Haakon ja Ruvdnaprinseassa berošteaba ollu nuorain, ja ovttas soai bargaba ásahit čoaggananbáikkiid gos olbmot besset ovddidit iežaset buoremus beliid.

Ruvdnaprinssas leat maid internašuvnnalaš beroštumit. Son lea leamaš ON ovddidanprográmma goodwillambassadevra 2003 rájes, son searvá Máilmmi ekonomalaš forumii ja lea bargan oažžut johtui Global Dignity.

Birasgažaldagain ovttastahttá Ruvdnaprinsa Haakon nanu guoddevaš ovdáneami innovašuvdna beroštumiiguin. Son jáhkká ahte teknihkalaš ođđafuomášumiid ásahemiin váldet vuhtii birassuodjalan jurdaga ja nu veahkehit min gávdnat čovdosiid boahttevaš hástalusaide. Sus lea dasa lassin earenoamáš beroštupmi áššiide mat gusket áhpái ja polára gažaldagaide.

Ruvdnaprinssa mielas lea dehálaš geavahit luonddu mii min birasta čohkket beaivválaš vásáhusaid, ja son doarju sihke alladási gilvvohallamiid ja astoáiggedoaimmaid ja aktivitehtafálaldagaid mat leat min buohkaid várás.

Falástallan ja olgoeallin

Aktiivvalaš árgabeaivi, olgoeallin ja falástallan leat dehálaččat Ruvdnaprinsii, sihke persovnnalaččat ja maiddái su doaimmas.

Internašuvnnalaš barggut

Ruvdnaprinssas leat viiddis internašuvnnalaš beroštumit, ja ovddidangažaldagat leat sutnje leamaš hui dehálaččat juo studeantaáiggi rájes. Guovddážis dáin bargguin lea ON ovddidanprográmma ja geafivuođa eastadandoaimmat.

Áhpi, biras ja guoddevašvuohta

Ruvdnaprinsa bargá viidát birasgažaldagaiguin, ja doallá fuomášumi das ahte birasbeali váldet vuhtii ovddidanbargguin, teknologiijas ja innovašuvnnas.

Ealáhusat ja innovašuvdna

Ruvdnaprinsa Haakon gidde stuora beroštumi ealáhusaide ja árvoháhkamii. Su beroštupmi guoská maid earenoamážit gründariidda ja ruoná nuppástuhttimii. Ruvdnaprinsa lea álggahan SIKT konferánssa, mii lea čoaggananbáiki nuorra jođiheddjiide.

Nuorat Norggas

Ruvdnaprinsabára mielas lea dehálaš ahte sii geat galget hábmet ihttábeaivvi Norgga, ožžot vejolašvuođa geavahit iežaset buoremus návccaid buoremussan min searvevuhtii. Danin soai áŋggirdeaba ásahit čoaggananbáikkiid gos olbmot besset ovdánahttit iežaset buoremus beliid.