Rabai Lullipolamonumeanta

Gonagas Harald bijai maid ođđa Gjøabygget vuođđogeađggi ja rabai Lullipolačájáhusa, mii galgá leat Frammuseas miehtá dán jagi. Čájáhus lea ovttasbargu Scott Polar Research Institutain, ja dat galgá čájehuvvot sihke Frammuseas ja Stuorabritannias. Čájáhusas leat norgalaš polamátkkošteaddjit guovddážis, ja dasa galget maŋŋil lasihuvvot dehálaš dávvirat mat gulle brihttalaš polamátkkošteddjiide.

Sihke Amundsena guovtti vielja mánáidmánát ja brihttalaš polamátkkošteaddji Robert F. Scott maŋisboahttit ledje rahpamis.

Bronssas ráhkaduvvon

Roald Amundsen, Helmer Hanssen, Oscar Wisting, Olav Bjaaland ja Sverre Hassel ledje vuosttaš olbmot máilmmis geat ollejedje Lullipolii. Go sii ledje čuoigan 57 beaivvi, de sii ollejedje polačuoggái, mánu ovdal go brihttalaš polamátkkošteaddjit jovde dohko, geaid jođiheaddji lei kapteaidna Scott, gii duššai ruovttoluotta mátkki vuolde.

Lea dáiddár Håkon Fagerås gii dien viđa olbmás lea ráhkadan monumeantta. Sii leat ráhkaduvvon bronssas, goasii guokte mehter alu, ja ceggejuvvon granihta vuođu ala. Hábmemii leamaš inspirašuvdnan govat maid sii ieža govvejedje Lullipolas, ja dat lea roavvat hábmejuvvon čájehan dihtii makkár garra dilálašvuođaid sii fertejedje nagodit čađahit. Monumeanta govvida dan allaáiggalaš čalbmeravkaleami go sii čužžot doppe gahperkeahtes oivviid, ja gehččet lávu ja leavgga guvlui mii ceaggá polačuoggas.

Monumeantta rahpamis čuojahii trompetčuojaheaddji Nils Petter Molvær.

Našuvnnalaš muittašeapmi Romssas

Bálddalaga Bydøy lágidemiin, searvá Gonagaslaš Allavuohta Ruvdnaprinsa Haakon stuora ávvudoaluide Romssas odne. Doppe leat čájáhusat, polarparade ja teáhter. Dasa lassin galget oažžut oktavuođa stáhtaministariin Jens Stoltenberggain, gii lea polačuoggás, ja maiddái Norgga Polarinstituhta ávvusáttagottiin mii lea čuvvon Amundsena sabetlahtu polačuogga guvlui.