Riddokultuvra ja sámi árbevierru

Gonagasskiippa ovddal bohte smávva fatnasat go skiipa lahkonišgođii iđđes Rivttágii, ja fatnasat čuvvo K/S Norge Rivttátvutnii. Gonagas Harald ja Dronnet Sonja manaiga gáddái Foldviikas, gos earet eará sátnejođiheaddji Eva Ottesen ja lieđđemánát Saron jaViljar sávve sudnuide buresboahtima.

Foldvikmárkanat

Márkanbáikkis muitalii Rivttát riddosearvvi ovddasteaddji Yngve Torbergsen Gonagasbárrii Foldvikmárkaniid birra, mat lágiduvvojit juohke jagi borgemánus. Márkanat leat sturron dan rájes go álggahuvvo 1989:s.ja dál doppe lávejit fitnat badjel 10.000 olbmo – dat lea oalle stuora hoidu suohkanii gos ásset 1200 olbmo.

Riddokultuvra lea váldoášši márkaniin, dat guoská sihke bruggaide ja návsttiide ja maiddái árbevirolaš dujiide. Ollu dološmállet fatnasa bohtet Foldviikii márkanáiggi, ja doppe leat sihke logaldallamat ja seminárat main čalmmustahttet fatnasiid ja riddokultuvrra suodjaleami.

Gonagas Harald beasai dearvvahit Nordnorsk Fartøyvernsenter ovddasteddjiid, ja Dronnet Sonja beasai fitnat gávppis man namma lea Gammelbutikken. Doppe son deaivvadii Rivttát duodjesearvvi olbmuiguin, geain leat árbevirolaš biergasat čájáhussan gávppis.

Rivttát fanasmusea

Riddokultuvra lei maiddái fáddán Rivttátbađas, gos Gonagasbárra finai fanasmuseas. Sverre Nordmo lei oahpisteaddjin ja muitaleaddji. Musea gullá Nordnorsk Fartøyvernsenterii – mii lea okta golmma našuvnnalaš guovddážiin man deháleamos ulbmil lea suodjalit ja fievrredit viidáseappot oahpu mii guoská boares fatnasiid dárbbašlaš bearráigeahččamii ja divodeapmái.

Gonagas ja Dronnet beasaiga maid oaidnit davvinorgga dáidaga ”golli ja ránes geađgi”.

Rivttát guossástallan loahpahuvvui feastačájáhusain mii lágiduvvui olggobealde musea. Sártnistis dáid doaluid oktavuođas gesii Dronnet Sonja ovdan man stuora barggu olbmot leat doaimmahan seailluhan dihtii Rivttát riddokultuvrra, ja maiddái olbmuid bargomovtta mii dahká ahte sáhttet lágidit sihke Foldvikmárkaniid, Morgans Dag ja maiddái dáid guovlluid stuorámus spábbačiekčandeaivvadeami mánáide.

Báikkálaš boramušat Ruŋggus

Loabát suohkana guossástallan álggahuvvui lunššain Ruŋggus. Gonagassii ja Dronnegii guossohedje árbevirolaš borramušaid giliviesus, sihke sáltebierggu, guhpariid ja vilgesguhpariid – ja bajaduššan luopmániid ja lávcca ja krumgáhkuid. Lunšša oktavuođas muitalii dálolaš Tor-Erik Lind suohkana eanadoalu ja vuovdedoalu birra. 

Feastačájáhus

Dasto lágiduvvui feastačájáhus Gonagasbárrii olggobealde giliviesu. Loabát mánát lávlo golbma sámi lávlaga, ja Johnny Nutti muitalii movt sápmelaččat leat birgen johttidilis márkasámi eallinvuohkái. Gonagas ja Dronnet beasaiga maid gullat sámi skuvlahistorjjá, ja movt Loabát skuvla geavaha luonddu oahpaheamis.

Loabát suohkanis gávnnadit golbma kultuvrra, ja báikkálaš servodagas vuhtto sápmelaččaid, dáččaid ja kveanaid kultuvrralaš girjáivuohta. Suohkan šattai oassin sámegiela hálddašanguvlui 2009:s, ja šattai dasto guovttegielat suohkan. Sártnistis čujuhii ge Gonagas Harald dasa man mávssolaš juste giella lea ge:

Dii lehpet ožžon áigái mánáidgárddi mas lea fálaldat sámi mánáide. Skuvllas lea sierra sámi ossodat, dis lea sierra sámi giellaguovddáš ja eatnat eará giellaprošeavttat. Dat lea dehálaš, eandalii danin go gielas lea nu stuora mearkkašupmi kultuvrii ja olbmo diđolašvuhtii, logai Gonagas.

Loabát buhcciidsiida

Maŋŋel čájáhusa mátkkošteigga Gonagas ja Dronnet Loabát buhcciidsiidii Deannjás. Doppe beasai Gonagasbárra dearvvahit sihke bargiid ja sin geat dieppe ásset. Dan maŋŋil manaiga soai smávvafatnasiid hámmánii gos fanas man namma lea Kongesjaluppen doalvvui sudno fas Gonagasskiipii.

Vuostáiváldin

Eahkes lágideaba Gonagas ja Dronnet vuostáiváldima Gonagasskiippas.