Guossástallan Ghanas

Ghana lea demokráhtalaš, ráfálaš riika mas lea nanu ekonomiija mii čađat ovdána. Riika lea lávkemen ođđa ekonomalaš ovdáneapmái, danin go leat gávdnan oljju, ja áigot buvttadišgoahtit meara alde Jubilee-fealttas 2012:s. Ruvdnaprinsa ja Ruvdnaprinseassa áiguba fitnat geahččat ollu bureslihkostuvvan ovttasbargoprošeavttaid, ja Norga ja Ghana galgaba vuolláičállit ja dovddusindahkat guokte ovttasbargošiehtadusa.

Várrepresideanta vuostáiválddii

Ghana várrepresideanta, John Dramani Mahamaa, vuostáiválddii Ruvdnaprinsabára almmolaš buresboahtinseremoniijain Flagstaff Houses distat iđit. Ruvdnaprinsa ja Ruvdnaprinseassa oaččuiga skeaŋkan goabbatge kenti – mii lea gieđain gorrojuvvon bivttas. Várrepresideanta Dramani Mahamaa čájehii maid Ruvdnaprinsii dan gudni ahte giesai su kenti sisa.

Maŋŋá deaivvadeami várrepresideanttain, ovddiduvvui Olje for Utvikling, OfU šiehtadus gaskal Norgga ja Ghana. Lei biras-ja ovddidanministtar Erik Solheim gii presenterii šiehtadusa ovttas Ghana Energiministariin dr. Joe Oteng-Adjei ja ms Sherry Ayittey, gii lea biras-, dutkan- ja teknologiijaministar.

Bargolunša ON kántuvrras

Lunšša váldofádda lei dat movt Ghana bargá ON duhátjagiulbmiliiguin, ja maiddái dat makkár bohtosat ON bargguin leat dán riikkas. Oppalaččat leat Duhátjagiulbmilbarggut ovdánan bures, ja Ghana namahuvvo dakkár riikan mii buoremusat leat dáid bargguiguin lihkostuvvan. Ghana lei vuosttaš riika Afrihkás mii nagodii juo 2006:s geahpedit beliin olmmošlogu geat ellet earenoamáš geafivuođas. Sii leat maid bures lihkostuvvan ovddidit ulbmila ahte sihkkarastit vuođđoskuvlaoahpu buohkaide, vaikko leat ge ain erohusat guovllus guvlui ja maiddái iešguđet olmmošjoavkkuid gaskkas. Go bálddastahttá eará stáhtaiguin Afrihkás, de lea hiv/aids njoammunvárra oalle vuollin Ghanas. Dávda lea njommon birrasii 2 % álbmogii. Ruvdnaprinseassa Mette-Marit rámidii otná lunšaboradettiin dan dehálaš barggu maid olbmot dieppe leat bargan:

I am very pleased to learn that Ghana has managed to reverse the spread of hiv over the last few years, gradually reducing the number of new infections. And I commend the efforts to increase the number of people with access to hiv specific health services, sa Kronprinsessen.

Oljokonferánsen Ghana Summit

The Ghana Summit lea jahkásaš konferánsa gosa čoahkkanit internašunála jođiheaddjit oljo- ja gássasuorggis. Sártnistis daid 400 alimusdási jođiheddjiide deattuhii Ruvdnaprinsa makkár vejolašvuođat Ghanas leat nugo ođđa oljobuvttadeaddji riika olahit ain ekonomalaš ovdáneami ja makkár ovttasbargovejolašvuođat leat internašunála industriijain. Ruvdnaprinsa deattuhii dan movt petroleumriggodagat sáhttet šaddat stuora illun Ghanai jus fal riggodagaid hálddaša dan láhkái ahte maiddái vuhtiiváldá birrasa ja bearráigeahččá ahte dietnasat bohtet ávkin olles álbmogii.

Erik Solheimas lei maid sáhkavuorru konferánssas. Son čalmmustahtii dan man dehálaš lea riggodagaid, birrasa ja oljodietnasiid bures hálddašit.

Siviila servodagas

Ruvdnaprinsabárra beasai maid deaivvadit iešguđetlágan NGO (non-governmental organizations) ovddasteddjiiguin. Sihke báikkálaš ja internašunála organisašuvnnat muitaledje makkár hástalusaid sii vásihit Ghanas, sihke petroleumdoaimma geažil ja maiddái eará servodatsurggiin. Ruvdnaprinsabára ja ministara mielas lei dehálaš beassat gullat sin dieđuid vai buorebut ožžot ollislaš gova riikkas.

Mállásat várrepresideanttsain

Vuosttaš beaivi dán golmmabeaivásaš guossástallamis loahpahuvvo eahkes almmolaš mállásiin várrepresideantta guossis.