Dugnadsdykk i Tromsø

Overfiske, klimaendringar og forureining har ført til ei eksplosjon av kråkebollar – som overbeit tareskogane. Rike og frodige økosystem blir omgjort til ein livlaus, ørkenliknande tilstand.

Kronprinsen besøkte Tarevoktere og deira dugnadsdykk nord på Tromsøya. Her er han om bord i Fiskeridirektoratet sin båt Rind. Foto: Rune Stoltz Bertinussen / NTB

Dykkarar i aksjon med å fjerne kråkebollar. Foto: Liv Anette Luane, Det kongelege hoffet

Under tysdagens dugnadsdykk fjerna 12 dykkarar rundt 2000 overbeitande kråkebollar. Kronprins Haakon var om bord på Fiskeridirektoratets båt Rind saman med leiarane i Tarevoktere, Ida Søhol og Juni Bjørneset, og ved hjelp av ein undervassdrone fekk dei sjå dei frivillige i aksjon under vatn.

Tysdagens dugnadsgjeng i fjøra. Foto: Liv Anette Luane, Det kongelege hoffet

Kronprins Haakon fikk sjå, høyre om, ta på og smake på kråkebolle. Ida Søhol i Tarevoktere forklarar. Foto: Rune Stoltz Bertinussen / NTB

Etter å ha sett korleis dei jobbar, møtte Kronprinsen dykkarane på land for å høyre korleis det hadde gått og engasjementet for livet i havet. Heilt til slutt fekk alle som ville, ein smak av delikatessa kråkebolle.

Tareskogane er grunnlaget for heile vårt marine økosystem. Arbeidet til dugnadsdykkarane fører til at tareskogane kan gå tilbake til si originale tilstand innan få månader.

Tarevoktere vart danna i 2019 og blir leia av Studentenes Undervannsklubb Tromsø.

Skipper Harald Knotten ankrar opp Fiskeridirektoratet sin båt Rind utanfor Hamna i Tromsø under dugnadsdykket. Foto: Liv Anette Luane, Det kongelege hoffet

Møtte elevar

Kronprins Haakon besøkte Kongsbakken vidaregåande skule onsdag morgon. Der møtte han elevar og heldt eit føredrag for fleire klassar ved skulen om internasjonal utvikling og berekraft. I over 20 år har Kronprinsen vore goodwillambassadør for FNs utviklingsprogram UNDP.

Avslutningsvis retta han seg mot elevane og utfordra dei på deira rolle som leiar:

– Du er ein leiar. Det er nokon som ser opp til deg i livet ditt. Korleis vil du bruke den leiarrolla? Kva har du lyst til at andre skal sitje att med kring deg?

Kronprinsen vart også med inn i ein kjemitime på vg2, ein engelsktime på vg1 og fekk ei lita minikonsert frå musikkelevar på vg1.

Frå besøket på Kongsbakken vidaregåande skule. Foto: Liv Anette Luane, Det kongelege hoffet

Polar havreise på Framsenteret

Siste del av programmet gjekk føre seg på Framsenteret, som er eit nordområdesenter for klima- og miljøforsking.

Norsk Polarinstitutt var vertskap for eit fagleg seminar og ei tematisk og geografisk reise frå kysten i Nord-Noreg og nordover – gjennom Barentshavet og opp i Polhavet. Reisa enda opp på andre sida av jordkloden – i Sørishavet, verdas minst utforska hav.

Forskarar frå Akvaplan Niva, Havforskningsinstituttet, UiT Norges arktiske universtitet og Norsk Polarinstitutt innleia, og det vart mange gode samtalar og oppfølgingsspørsmål undervegs.

Kronprinsen helsar på forskar Ann Merete Hjelset frå Havforskningsinstituttet som snakka om snøkrabben som ei viktig og ny ressurs i Barentshavet. Foto: Liv Anette Luane, Det kongelege hoffet

Havisen slår sprekkar. Professor Marit Reigstad frå UiT Norges arktiske universitet oppsummerte hovudfunna i det norske forskingsprosjektet Arven etter Nansen som har undersøkt det nordlege Barentshavet. Foto: Liv Anette Luane, Det kongelege hoffet

Sist oppdatert 26.04.2024.