Ruvdnaprinsabárra Londonis

Gonagaslaš Allavuohta Ruvdnaprinsa rabai stuora ealáhuskonferánssa mii čohkke norgalaš ja brihttalaš ealáhusealllinoasálaččaid sihke energiija,teknologiija ja ruhtadansurggiin ja geat barget eanet ovttasbarggu nammii norgalaš ja brihttalaččaid gaskka ruoná molsuma olis.

Erenoamáš dehálaččat leat ovttasbargosuorggit nugo áhpebiegga, hydrogena, CO2-gieđahallan ja teknologiija ođasmuvvi energiija dáfus.

Nanu čanastagat

- Čanastagat gaskal dán guovtti riikka lea nannosat ja leat nanu ruohttasat. Min oktavuohta lea huksejuvvon olu jagiid ovttasbarggu vuođul. Mii leat guimmežagat politihka ja kultuvrra dáfus, ealáhusdoaimmain, suodjalus -ja sihkkarvuođapolitihkas. Ja dát leat dušše muhtun oasit, dajai Ruvdnaprinsa go rabai ealáhuskonferánssa.

Ruvdnaprinsa Haakon doallá sártni ealáhuskonferánssas "A strong partnership for the Green Industrial Transition”. Govven: Nina Rangøy / NTB

Stuorra-Británnia energiijaministtar Grant Shapps dajai sártnistis ahte Norga lei juo 40-jagiin stuorraváldi energiijabuvttádeami dáfus go máilmmi stuorámus fápmostašuvdna lei dalle Vemorkas. Ja maiddái son deattuhii historjjálaš, nanu čanastagaid gaskal Norgga ja Stuorra-Británnia. Son gesii ge ovdan ahte brihttalaččat ja norgalaččat ovttasbarge stuora bilidanakšuvnnas Vemorkas nuppi máilmmisoađis.

Girjjálašvuohta čatná min oktii

Girječállit Karl Ove Knausgård, Lars Mytting ja Siri Helle ledje girjjálaš jienat doaluin mat čohkkejedje brihttalaš girjegávppiid, lágádusaid, jorgaleddjiid ja kulturjournalisttaid. Dát girjjálašvuođasuorggi deaivvadeapmi lei norgga ambasadevrra dálus Kensingtonis seamma ovdalgaskabeaivve. Gonagaslaš Allavuohta Ruvdnaprinseassa rabai deaivvadeapmi, ja olgoriikaministtar Anniken Huitfeldt ges loahpahii.

Kronprins Haakon og Kronprinsesse Mette-Marit møtte forfatterne Siri Helle, Lars Mytting og Karl Ove Knausgaard i ambassadørens residens i London. Foto: Nina Rangoy / NTB

- Lean nu giitevaš girječálliid skeaŋkkaid ovddas midjiide buohkaide. Girjjálašvuohta čatná min sihke ovdalašáigái, boahtteáigái, nannámiid rastá ja min iešguđetge eallinvásáhusaid rastá. Girjjálašvuohta čatná min guhtet guoibmáseamet. Ja dat čatná ovttaskas olbmo alccesis, logai Ruvdnaprinseassa rahpansártnis.

Skatepárka Brixtonis

Buorit deaivvadanbáikkit leat dehálaččat go lea sáhka olbmuid oktiičatnamis ja go buori lagasbirrasa galgá ásahit. Maŋŋelgaskabeaivve galledii Ruvdnaprinsabárra Stockwell skatepárkka, Brixton nammasaš gávpotoasis. Doppe beasaiga earret eará deaivvadit skaternuoraiguin geat doppe lávejit deaivvadit. Norgga fitnodat Betongpark lea divodan dán skatepárkka Londonis, mii lea okta boarraseamos párkkain Stuorra-Británnias.

 Ruvdnaprinsa Haakon ja Ruvdnaprinseassa Mette-Marit deaivvadeaba skaternuoraiguin Stockwell Skatepárkkas. Govven: Nina Rangøy / NTB

Eahkes oasálasttiiga Ruvdnaprinsa ja Ruvdnaprinseassa vuostáiváldimis Lindley Hall-báikkis man Norgga ambassáda lágidii.

Deaivvadeapmi Walesa Prinssain ja Prinseassain

Gonagaslaš Allavuođat Walesa Prinsa ja Prinseassa válddiiga Ruvdnaprinsabára vuostá Windsor Castle šloahtas duorastat ovdalgaskabeaivve. Dát šloahtta Londona lahkosis lea brihttálaš monárkka resideanssaid searvvis.

Dan maŋŋel oasálaste Ruvdnaprinsa, Ruvdnaprinseassa ja Walesa Prinsa ja Prinseassa čoahkkimis ruoná energiijačovdosiid birra. Dása serve maiddái Norgga Ealáhuseallinovddasteaddjit.

Ruvdnaprinsabárra deaivvada Walesa Prinssain ja Prinseassain. Govva: Kensington Palace