Ávvudedje Prinseassa válddálašvuođabeaivvi

Prinseassa válddálašvuođabeaivi lei ođđajagimánu 21. beaivvi, muhto ávvudeapmi maŋiduvvui dán vahku duorastahkii ja bearjadahkii rohttudávdda geažil. Ávvumállásat Oslo váldogirjerádjosis lei Norgga ráđđehusa skeaŋka sutnje.

Nuorat válde vuostá

Torshovkorpset čuojahii go guossit boahtigohte Anne-Cath. Vestly šiljui olggobealde girjerádjosa. Dát musihkkajoavku lea árvideames máilmmi boarraseamos ja stuorámus dákkáraš joavkkuid searvvis,  ja dát lea joavku mánáide ja nuoraide geain leat erenoamáš dárbbut, oahppanhástalusat dahje muđui muhtun lágán doaimmashehttejupmi. 

Prinseassa Ingrid Alexandra ovttas stáhtaministtariin jođus ráđđehusa feastamállásiidda. Govven: Simen Løvberg Sund, Gonagaslaš hoavva

Loahpas bođii Prinseassa Ingrid Alexandra ovttas Gonagasbárain ja muđui Ruvdnaprinsabearrašiin. Stáhtaministtar Jonas Gahr Støre, stáhtaráđđi Trygve Slagsvold Vedum ja Oslo sátnejođiheaddji Marianne Borgen sávve sidjiide buresboahtima.

Torshovkorpset čuojaha Anne-Cath. Vestly šiljus olggobealde Deichman girjerádjosa Bjørvikas. Govven: Sara Svanemyr

Olggobealde uskkádaga deaivvadii Prinseassa Ingrid Alexandra 25 nuoraiguin geat ovddastedje buot filkkaid Norggas – buohkat ledje vásedin bovdejuvvon doaluide ja dát nuorat leat áŋgirat valaštallamis, kultureallimis, servodatáššiin, politihkas ja organisašuvdnaeallimis. Maria Gunilla Påve Wilks (22) Snoasas eret ja Håvard Bergseng Rødsand (18) Viesterállasis eret dearvvaheigga Prinsesassa ja sávaiga sutnje buresboahtima ja celkkiiga lihkkusávaldagaid beaivái.

Ruvdnaprinsabárra boahtiba Deichmanai, Bjørvikas gos sudno nieidda válddálašvuođabeaivvi ávvudeapmi lei. Govven: Sara Svanemyr, Gonagaslaš hoavva

Nuorra artisttat ja dáiddárat hervejedje ávvudeami. Go manne girjerádjosa sisa, de lávlo nuoramus nieiddažat Det Norske Jentekor-lávlunkoaras čáppa lávlaga Gonagasbárrii ja doallogoddái. Ja go manne mállásiidda 5. gearddis, de guoimmuhii artista Amanda Delara Nikman, Delara, «Nå er det oss» ja neavttár Ina Svenningdal logai teavstta «Hei, Endelig hei», man Dag Tyne lea čállán. Das álgu lea ná:

Hei, Endelig hei.
Endelig er vi sammen. Endelig er det oss.
Endelig kan vi feire deg, vår egen prinsesse.
Endelig kan vi dele en stund med deg, med gjester fra hele landet.

Dele en stund med de som har reist langt, og vi som har reist kort.
De som bor ved vannet og de som bor til fjells.
De som ligger i køyeseng og de som ligger i blomstereng.

En samling med mennesker og forskjellige historier,
pent stablet sammen i en hylle her på Deichman …

Maŋemus musihkkalaš guoimmuheapmi ovdal mállásiid, lei lávlla «No. 4 - Lite og stort» man Det Norske Jentekor lávllui.

– Historjjálaš beavi

– Lihkku beivviin! Dása leat illudan! Mii ávvudit sihke dábálaš riegádanbeaivvi, ja seammás maiddái historjjálaš beaivvi min našuvdnii, logai stáhtaministtar Jonas Gahr Støre sártnis man doalai Prinseassa Ingrid Alexandrai feastamállásiin.

– Don riegádit vuosttaš nissonolmmožin gii lea truvdnoárbbolaš min gonagasriika historjjás. Dál leat deavdán 18 jagi ja leat olahan válddálašvuođaagi. Dat leat historjjálaš, logai stáhtaministtar.

Stáhtaministtar Jonas Gahr Støre doalai sártni Prinseassa Ingrid Alexandrai. Govven: Simen Løvberg Sund, Gonagaslaš hoavva

Støre logai ahte Prinseassa olaha válddálašvuođaagi áiggis mii lea ráfeheapme, muhto ahte son gu0ddá árbbi mii lea árvvolaš ja mávssolaš.

– Ráfeheames diliin lea min nášuvdna dovddidan gonagasviesuin mii čájeha mot lea dusttet dálááiggi. Gonagasviessu lea ipmirdan makkár rolla sis lea – dat čohkke ja fátmmasta. Ja das leat bistevaš, nanu árvvut maid seaguha fiinna, rašes attáldagain- namalassii ahte nagoda ođasmahttit iežas ja heivehit doaimma dálá áigái, logai Støre.

Prinseassa Ingrid Alexandra geahčesta ádjá guvlui dan botta go stáhtaministtar doallá sártni. Govven: Lise Åserud / NTB

Son attii Prinseassii rávvaga: Dus lea dat erenoamáš, eahpedábálaš dilli- ahte galggat šaddat Norgga Dronnet. De lea buorre gáhttet áibbas dábálaš osiid eallimis vai nagoda buot eahpedábáláš osiid jierpmálaččat hálddašit.

– Galggat leat nu mot leat. Dovdda riikka. Dovdda olbmuid geat dáppe orrot. Min eallimiid. Min nieguid. Balu maid dovdat. Nie don čanat báttiid mat ovttastit gonagasviesu ja álbmoga, boahttevaš buolvvaide, logai Støre.

Doalai giittossártni

Maŋŋel vuosttaš oasi mállásiin, doalai Prinseassa Ingrid Alexandra ieš sártni gos giitalii buot gussiid ja sin geat ledje ráhkkanan dán eahkedii vai šattai fiinna vásáhussan buohkaide geat oasálaste. Erenoamážit giittii stáhtaministtara, stuorradiggepresideantta ja alimusriektejustitiariusa geat válde su vuostá ja oahpistedje Prinseassa go galledii dán golbma stáhtaválddi beaivvi ovdal go devddii 18 jagi ođđajaigmánus.

– Dát galledeamit ledje duođai muituhussan dasa man lihkolaččat mii leat dáppe Norggas. Lea muittuhussan min demokratiijai ja min oadjebas stivrenvuogádahkii. Dnt leat mii norgalaččat huksen áiggiid čađa ja dan galgat beaivválaččat ain ovdánáhttit ja várjalit, logai Prinseassa.

Prinseassa Ingrid Alexandra doallá sártni ráđđehusa feastadoaluin. Govven: Håkon Mosvold Larsen / NTB

Prinseassa Ingrid Alexandra logai maiddái ahte dovdá iežas lihkolaččan go lea bajasšaddan dakkár riikas gos lea luohttámuš olbmuid gaskkas.

Loga Prinseassa sártni

Gonagasa beavddis

Ledje badjelaš 200 guossi feastamállásiin ja guossit bohte buot servodatsurggiin iešguđetge beroštumiiguin ja eallinoainnuin.

Prinseassa Ingrid Alexandra čohkkai Majestahta Gonagasa beavddis, ovttas stuorradiggepresideanttain Masud Gharahkhani, stáhtaministtar Jonas Gahr Støre, No Isolation-gründer Karen Dolvai, ovddeš stáhtaministtar Gro Harlem Brundtland, paraalpinista Jesper Saltvik Pedersen ja artista Marie Ulven Ringheim, Girl in Red.

Mállásiid oktavuođas lei kultuvrralaš guoimmuheapmi artista Eva Weel Skram, girječálli Lars Saabye Christensen, Akershus johttiteáhtera ja artista Hkeem bokte.

Prinseassa válddálašvuođabeaivvi ávvudeapmi joatká bearjadaga. Majestehta Gonagas ja Majestehta Dronnet bovdeba gallamállásiidda Šloahtas ja guossit bohtet Norgga almmolašvuođas, Eurohpa gonagasviesuin bearraša ja ustibiid lassin.