Ruvdnaprinsaregeanta rabai Stuoradikki

Koronadávdda njoammuma eastadan njuolggadusaid mielde ledje dušše 200 olbmo mielde rahpandilálašvuođas. Dábálaččat lávejit leat sullii 750.

Oanehit rahpandilálašvohta

Ruvdnaprinsa Haakon logai truvdnosártni vuosttaš geardde odne. Majestehta Gonagas lea buohccindieđihuvvon, ja lei ge Ruvdnaprinsaregeanta gii čađahii dien allaáiggálaš rahpama su sajis.

Truvdnosárdni sisttisdoallá Ráđđehusa áigumušaid boahtte jahkái. Sártni lea Ráđđehus čállán. Dan deattuhii stáhtaministtar Erna Solberg dakko bokte ahte attii sártni Ruvdnaprinsaregentii Stuoradiggesálas.

165. Stuoradikki rahpamis.Govva: Heiko Junge / NTB

Truvdnosárdni ja rahpandilálašvuohta lei oanehit go láve leahket.

Stáhtaráđđi Guri Melby logai dieđáhusa Riikka dili birra ja su maŋŋil doalai stuoradiggepresideanta Tone W. Trøen sártni. Norgga solistalávlunjoavkku solisttat rahpe seremoniija Gonagassálmma lávlumiin ja loahpahedje našunálalávlaga «Gal mii ráhkistit dán eatnan» vuosttaš vearssain.

165. Stuoradikki rahpamis.Govva: Heiko Junge / NTB

Čállojuvvon Vuođđoláhkii

Dát almmolaš seremoniija markere ođđa sešuvnna álggu ja ahte Stuoradikki árgabeaivi lea álgán. Rahpan lea álo golggotmánus ja dohko čoahkkanit stuoradiggeáirasat, Ráđđehus ja Gonagasviesu ovddasteaddjit, ja dat lea okta dain eanemus allaáiggálaš almmolaš seremoniijain mat mis leat Norggas.

Go Ruvdnaprinsaregeanta joavddai Løvebakkenii ovttas Dronnegiin eske veaigin, de lei deputašuvdna mii sávai sudnuide buresboahtima. Das ledje fárus čieža Møre ja Romsdal stuoradiggeáirasa. Deputašuvnna jođihii Helge Orten.

Ruvdnaprinsaregeanta ja Dronnet boahtime 165. Stuoradikki rahpamii. Govva: Simen Løvberg Sund, Gonagaslaš opmodat

Stuoradikki allaáiggálaš rahpan lea árbevierru mii manná maŋos gitta 1814 radjái, ja lea čállojuvvon Vuođđoláhkki, § 74:

"Nu fargga go Stuoradiggi lea konstitueren iežas, de dan rahpá Gonagas dahje dat geasa son oskkilda dan doaimma. Son rahpá Stuoradikki gieđahallamiid sártniin mas muitala riikka dili birra ja dilálašvuođaid maid son earenoamážit dáhttu čalmmustahttit Stuoradiggái. Ii makkárge ákkastallan galgga dáhpáhuvvat dan áiggis go Gonagas lea das."

165. Stuoradikki rahpamis. Govva: Sven Gj. Gjeruldsen, Gonagaslaš opmodat

165. Stuoradikki rahpamis. Govva: Morten Brakestad / Stortinget