Leage dakkár go don leat!

Stuora boradansálii ledje láhčán saji 159 guossái, ja luossa ja bálddis guossohuvvui. Det Norske Jentekor /Norgga Nieiddaidlávlunkoara 50 bunádain čiŋahuvvon lávlu lávlo gussiide ja guossoheddjiide buresboahtima beavdái.

Majestehta Dronnet sávai buohkaide buresboahtima ja doalai vuosttaš sártni konfirmántii.

Dronnet Sonja sávvá buresboahtima ja doalai vuosttaš sártni Prinseassa Ingrid Alexandrai. Govva: Terje Bendiksby/ NTB scanpix

Dronnet deattuhii Prinseassa bearraša ja ustibiid mat leat su birrasis, ja sin vásáhusaid ja prošeavttaid maiguin barget ovttas. Maŋemus áiggi leaba Dronnet ja Prinseassa bargan Gonagasbára konfirmašuvdnaskeaŋkkain – mii lea hui earenoamáš bunáda.

- Dán stuora beaivvi fievrredat don ruohttasiiddát mielddistat – juo duođai dat lea fárus du biktasiin! Du ođđa Aust-Telemarkku bunáda, mainna don ieš leat maid bargan juo álggu rájes, das leat dološ minstarat, ivnnit ja čiŋat heivehuvvon oktii earenoamážit du váras. 

Loga Dronnega sártni dáppe

Leage dakkár go don juo leat!

Maŋŋel váldoborramuša lei Majestehta Gonagas vuorru doallat sártni. Son sártnui sihke gonagassan, fáttarin ja áddján ja deattuhii rolla mii Prinseassa lea vuordimin boahttevuođas, su vejolašvuođaid ja persovnnalaš eavttuid. Gonagas attii Prinsessii buoremus rávvaga: Leage dakkár go don juo leat ge!

- Jus dás odne galggašin ovtta rávvaga addit dutnje, nugo gonagas, fáttar ja áddjá – de lea dát ráva: Leage dakkár go don juo leat . Oza du iežat geainnu. Jus vikkat leat eará go dat mii don leat, de dat fuomášuvvo – ja dahká du unnibun go don leat. Luohte dasa ahte don leat doarvái!

Gonagas Harald doallá sártni konfirmántii. Govva: Terje Bendiksby / NTB scanpix

Gonagasa humoristtalaš beali beasaime maid diehttelas gullat su sártnis:

- Maŋemus go leimmet čoahkkanan dása Šlohkii ávvudit du, de don vuos čirrot čađat go bismma doalai gástasártni, ja de ođđet čađat go mun dollen dutnje sártni lunšša oktavuođas. Odne lea somá oaidnit ahte don leat sihke gozuid alde ja duhtavaš –  vai gulat dan maid mii hálidit dadjat dutnje dán earenoamáš dilálašvuođas!

Loga Gonagasa sártni dáppe

Ruvdnaprinsabára sárdni

Gonagaslaš Allavuođaguovttos Ruvdnaprinsa ja Ruvdnaprinseassa doalaiga ovttas sártni. Soai muitaleigga ollu hearvás fearániid Prinseassa bajásšaddamis, mat leat hui mihtilmasat sutnje – ja sániid maid konfirmánta sáhttá bidjat muitui.

Ruvdnaprinsabárra doallá sártni Prinsessii. Govva: Terje Bendiksby / NTB scanpix

- Ráhkis Ingrid, don leat earenoamáš jierbmás olmmoš. Ii buohkain leat riegádeamis rájes juo dakkár fápmu go dus lea. Moai ean leat goassege eahpidan dan ahte don nagodat njuolggočilggiid vázzit máilmmis. Vaikko dáidet boahtit moraš beaivvit, arvedálkkit ja ollu mierká, muhto maiddái beaivvádagat ja muohtabeaivvit, liegga biekkat ja geasseijat. Buot diet leat eallima attáldagat dutnje. Fertet beare muitit geahččat beaivvášbadjáneami doarvái máŋgii, de ipmirdat ahte juohke beaivi lea unna attáldagaš mii leahkkasa du čalmmiid ovdii.  Ja de dieđát Ingrid, ahte leat juste árgabeaivvit mat ráhkadit ja hábmejit eallima. Go deaivvadit buot eallimiin mii min birasta.

Loga Ruvdnaprinsabára sártni dáppe

Prinseassa eanu, Espen Høiby, doalai sártni Ruvdnaprinseassa bearraša bealis. 

Giittossárdni

Prinseassa ieš doalai eahkeda maŋemus sártni.

- Dát lea munnje earenoamáš beaivi. Duhát giitu buot buriid sániid ovddas maid lehpet munnje lohkan – ja dán hearvás ávvudeami ovddas. Dál lea buorre vejolašvuohta munnje beassat giitit buohkaid din geat lehpet dehálaš olbmot mu eallimis, ja geat lehpet dán beaivvi dahkan ná čáppa beaivin.

Prinseassa Ingrid Alexandra giitalii iežas lagamuš bearraša, veaháš suohtas lági mielde maid.

Prinseassa doallá giittossártni. Govva: Sven Gj. Gjeruldsen, Gonagaslaš hoavva

Loga Prinseassa sártni dáppe

Lunša loahpahii konfirmašuvdnadoaluid almmolaš oasi. Eahkes leat priváhta mállásat ustibiidda ja bearraša Skaugumis.