Gonagasbárra guossin Askøyas

Sátnejođiheaddji Terje Mathiassen ja politiijameasttir Kaare Songstad sávaiga Gonagasbárrii buresboahtima go soai joavddaiga bruggii gonagasfatnasiin.

Ollu Askøy ássit ledje boahtán sávvat Gonagasbárrii buresboahtima Herdlas Askøyas. Govva: Marit Hommedal / NTB scanpix

Dasto jotke sii mátki viidáseappot Herdla dávvirvuorkái, gos álggos muitaledje Gonagassii ja Dronnegii  čázi mielde njoammun bakteriijaid ja čáhceášši birra mainna suohkan dál rahčá. Soai beasaiga deaivvadit dearvvašvuođabargiiguin, sin geaidda njoammun lea čuohcan ja suohkana ovddasteddjiid.

Kulturhoavda Gunnar Brynjulfsen, geasa alcces čuozai čáhcenjoammun, servodatmedisiinna fágahoavda Ami Bruvik Næss, čáhce -ja duolvačáhcehoavda Anton Bøe ja várresátnejođiheaddji Bård Espelid ja sátnejođiheaddji Terje Mathiassen muitaledje Gonagassii ja Dronnegii čázi mielde njoammuma birra. Govva: Marit Hommedal / NTB scanpix

– Moai Dronnegiin bohte din guossái hui earenoamáš dilálašvuođas. Okta dain duođaleamos diliin maid mii eaŋkilolbmot ja servodat sáhttit vásihit, lea dat ahte ii leat buhtis čázi gávdnamis. Dát váttis dilli maid dii lehpet vásihan, ja mii dis ain lea, lea geahččalus olles servodahkii, logai Gonagas sártnistis ollu Askøy ássiide geat ledje boahtán Hertla fortii.

Gonagas doallá sártni Askøyas. Govva: Marit Hommedal / NTB scanpix

Historjá, kultuvra ja luondu

Strusshavn skuvlajoavku lávllui Askøylávlaga Gonagassii ja Dronnegii, ja de muitalii historihkkár Erling Virkesdal Herdla historjjá.

Herdla lea suolu suohkana davágeahčen, hui dovddus danin go doppe lea rikkis loddeeallin ja luonddureserváhtta masa gullá Herdlevalen ja guhkes geađgesáttogáttit.

– Askøy lea dehálaš oassi Vestlándda riddokultuvra. Guovllu ássi lea čuđiid mielde jagiid báidnan min našuvnnalaš historjjá ja girjjálašvuođa. Báikkálaš olbmuid/stril identitehta lea áiggiid čađa rievdan. Muhto lihkus lea oalle guhkes gaska Amalie Skrams olbmuid/hellemyrsfolket ja otná ássiid gaskkas, ođđaáigásaš Hordalanda riddoguovlluin, logai Gonagas.

Gonagasbárra beasai vásihit máŋga miellagiddevaš kulturovdanbuktimiid. Ollu ivnnit lea kulturfálaldat Askøy mánáide ja nuoraide. Dat sisttisdoallu iešguđet kultuvrraid lávluma, dánssa ja musihka. Gonagasbárra beasai geahččat oasi čájáhusas. Govva: Sven Gj. Gjeruldsen, Gonagaslaš hoavva

Artista Berit Håpoldøy lávllui «De Zee plog» - nederlándalaš skiippa birra mii 1817:s borjjastii Amsterdamas Amerihká guvlui. Skiippas ledje lagabui 600 duiskalaš emigrántta. Davvimearas čuzii issoras garra stoarbma ja skiippa stivli doddjui. Skiipa massii kurssa ja rievddai stivrrár haga Davvimearas, gitta dassážii rievddai gáddái Skjellanger dállodollui Herdla báikkis. Máŋggas olggosfárrejeddjiin bisánedje Bergenguovlluide.

Dasto oaččui Gonagasbárra vejolašvuođa oahpásnuvvat buorebut muhtun Askøy olbmuide ja organisašuvnnaide. Buvddain olggobealde Herdla Musea ledje earet eará Askøy Ealáhussearvi, Birasageanttat, Eaktodáhtolašguovddáš ja Askøy Dearvvašeallinguovddáš.

Gonagasbárra beasai dearvvahit máŋga organisašuvnna guossástallan mátkkistis, earet eará Askøy Ealáhussearvvi. Govva: Sven Gj. Gjeruldsen, Gonagaslaš hoavva.