Fylkkamátki Hordalandii

Gonagas ja Dronnet geavaheaba Gonagasskiippa Norge mátkki oktavuođas, ja Norge fatnasis doalvvui smávit fanas sudno Jondal guovddáža smávvafanashámmanii. Doppe vurddiiga 2. luohkkálačča guovttos Jarand ja Julia liđiiguin.

Jarand Selsvik ja Julia Lothe Midthun sávaiga Gonagasbárrii buresboahtima. Govva: Sven Gj. Gjeruldsen, Gonagaslaš hoavva

Juklafjord astoáigeguovllus lei vejolaš guovlladit buvddain main ledje báikkálaš borramušat, ja gos čájehedje fanashuksema ja muitaledje Jondal mátkeealáhusa birra. Gonagas Harald ja Dronnet Sonja beasaiga máistet lefsegáhkuid ja geahčadit  "kyrkjebåt" man birra Sverre Haugen máhtii muitalit eanet.

Jondal lea guovddáš báiki sidjiide geat guossástallet Folgefonna našunálapárkka ja dan stuora jiehki. Dronnet Sonja beasai ge  govas čájehit ollu báikkiid dien guovllus gos son ieš lea finadan.

Dronnet Sonja lea dán guovllus leamaš máŋgga geardde ja beasai ge Folgefonna modeallas čájehit máŋga oahpes báikki. Govva: Sven Gj. Gjeruldsen, Gonagaslaš hoavva

Lei lágiduvvon fiinna kulturprográmma Gonagasbárrii. Álggos doalai sátnejođiheaddji Jon Larsgard buresboahtin sáhkavuoru, ja dasto guoimmuhedje Jondal skuvlamánát koaralávlumiin, čuojahanjoavkkuin, dánssain ja teakstalohkamiin. Dronnet doalai fylkkamátkki vuosttaš sártni, mas son giitalii liekkuslaš buresboahtima ovddas, ja rámidii čáppa Hardangervuona maid soai beasaiga návddašit Gonagasskiippas:

- Dát ovddolaš birrasat leat ge oallugiidda duohta govva mii čájeha min riika. Ja dan lea álki ipmirdit – earenoamážit eske iđđes go bođiimet Hardangervuona mielde Gonagasskiippain.

Jondal skuvlamánát guoimmuhedje dánssain ja musihkain. Govva: Sven Gj. Gjeruldsen, Gonagaslaš hoavva

Dronnet Sonjas ledje maid historjját su iežas mátkkiin Folgefonnas ja muđuige dan guovllus. Ollu olbmot fitnet našunálapárkkas, ja dat lea dehálaš oassi Jondal ealáhusvuođus. Dronnet deattuhii resurssaid suodjaleami ovddasvástádusa:

- Dálkkádagaid nuppástuvvamiid váikkuhusat muittuhit olbmui dávjá ahte mii leat oassi stuorát máilmmis. Mii  buohkat dat fuomášit – earet eará go oaidnit dán riika  jihkiid, nugo Folgefonna, mot dan suddá. Mii vásihit maid nuppástuvvamiid dakko bokte ahte leat dávjjit uđđasat ja dulvevárra. Dat čájehit midjiide makkár oktasaš  ovddasvástádus mis lea vára váldit luondduvuođus, mas min eallin lea gitta maiddái boahtteáiggis, logai Dronnet.      

Vi samlar bilete frå fylkesturen i eit eige fotoalbum

Viidáseappot Oddai

Odda Musihkkasearvi čuojahii "Norge i Rødt hvitt og blått" go Gonagas ja Dronnet lávkiiga gáddái Oddas eske veaigin.

Gonagasbárra joavdá Oddai. Govva: Tom Hansen, Hansenfoto.no

Vázzingáhta mielde váccidettiin beasai Gonagasbárra gullat eanet sihke Skare ja Røldal birra, tuvralágideaddji Trolltunga Active ja Tyssedal ja dan Kraftmusea birra.

 Almerkepárkkas ledje lágidan álbmotfeastta, sihke sártniiguin ja lávlagiiguin. Sátnejođiheaddji Roald Aga Haug sávai buresboahtima. Girječálli Frode Grytten bajásšattai Oddas  ja su girjjiin lea dávjá dan guovllu biras vuolggabáikin. Grytten logai máidnunčállosa Oddai ovdal go Gonagas ieš manai sárdnestullui.

- Ii leat álki mannat sárdnestullui diekkár girječálli maŋŋil. Danin lea ge munnje álki siteret su dáiguin oadjebas sániiguin: "Go alimus vásáhusain álgá, de lea vejolaš joatkit dušše ovtta guvlui, namalassii vulos guvlui",leaikkastalai Gonagas Harald.

  Dronnet Sonja oaččui albma buori buorranastima Oddas. Govva: Tom Hansen, Hansenfoto.no

Kulturskuvlla mánáidjoavku -  Tyssedalkoara vehkiin – lávllui Gonagassálmma maŋŋil Dronnega sártni.

Dulveeastadeapmi

Oddai čuzii garrasit 2014 dulvi.  Gonagas ja Dronnet deaivvadeigga Granheim bearrašiin Hjøllošalddi alde. Dat bearaš massii 2014 dulvvis iežaset viesu. Dan dáhpáhusa namuhii Gonagas Harald iežas sártnis:

-Didjiide čuozai garrasit 2014 dulvi. Moai Dronnegiin leimme duođai dovddolaččat din fárus dalle go lei buot vearrámus dulvi.  Moai atne árvvus din duostilvuođa ja dan mot dii nagodeiddet vuostegieđageavada hálddašit. Gáibida oba stuora fámu nagodit jođihit gádjunbargguid seammás go oaidná ahte su iežas viessu gahččá ja mannagoahtá dulvečázi mielde. Diekkár fápmu lei siviilasuodjalushoavddas Knut Granheimas dien issoras beaivvi golggotmánus 2014. Son – ja máŋggas suinna – ánssášit gudni diekkár duostilit barggu ovddas.

Gonagasbárra beasai gullat 2014 issoras dulvvi birra. Dulvečáhci doalvvui Granheim bearraša viesu. Govva: Marit Hommedal / NTB scanpix

Gonagasbárra beasai gulat dien dramáhtalaš beaivvi birra – ja mot gilli dál lea bargat sihkkarastit gávpoga ođđa dulvviid vuostá Opo jogas.

Mállásat elfápmodoaimmahagas

Eahkes galgá Gonagasbárra borrat mállásiid Tyssedal elfápmodoaimmahagas. Arkiteavttat vižže Italia katedrálain inspirašuvnna dalle go sárgo dien čalbmáičuohcci hukseha Sørfjordenis, dan muitalii Gonagas Harald eske veaigin.

Ihttin jotket mátkki Granvin ja Ulvik suohkaniidda.