Stáhtaguossástallan Korea Republihkas

Guossástallan čalmmustahttá dan ahte lea 60 jagi gollan dan rájes álggahuvvo diplomáhtalaš oktavuođat min guovtti riikka gaskii. Republihkka Korea lea Norgga deháleamos gávperiika Asias , earret Kina, ja mis lea lagas gulahallan ja dađistaga eanet ovttasbargu maiddái ollu eará surggiin.

Buresboahtinseremoniija

Diibmu 10.00:s bođii Presideantabára korteše Šloahta lusa, ja njunnošis lei Gonagas Allavuohta Ruvdnaprinsas Haakon. Doppe vuostáiválddii Gonagas Presideantabára ja Vuosttašroavvá allaáiggálaš seremoniijain.

Mánát sevve Korea ja Norgga leavggaiguin Šloahttašiljus. Presideantabárra, Gonagas ja Ruvdnaprinsa aste bisánit dearvvahit mánáid maŋŋá allaáiggálaš buresboahtinseremoniija. Govva: Ryan Kelly / NTB scanpix

Kránsabidjan

Lea dáhpin ahte guossástalli stáhtaoaivámušat bidjet lieđđekránssa Akershus galbba Našunálamonumeantta lusa, ja dien láhkái gudnijahttet sin geat sođiin leat gahččan Norgga ovddas. Odne lei Akershus seremoniija viiddiduvvon vel ovttain lieđđebidjamiin.

Presideanta Moon ja roavvá Kim dearvvaheaba NORMASH veteránaid. Govva: Sara Svanemyr, Gonagaslaš hoavva

Norga lei okta dain riikkain mat ledje fárus suodjaleamen Korea Republihka Koreasoađis (1950-1953). Norga sáddii dohko NORMASH sanitehtaveaga. Oktiibuot ledje soahtešilju buohcciviesus doppe 623 norgalaš dievddu ja nissonolbmo, ja sii dikšo birrasii  90 000 soahteolbmo ja siviila olbmuid.

Presideanta Moon Jae-in bijai lieđđekránssa sin muitomearkka lusa odne. Máŋga NORMASH veterána ledje maid mielde dan seremoniijas.

Gonagas Harald dearvvaha NORMASH sanitehtaveaga veteránaid. Govva: Sara Svanemyr, Gonagaslaš hoavva

Ráfisárdni Aulas

Maŋŋil lieđđeseremoniija doalai Presideanta Moon Jae-in sártni Universitehta Aulas. Son sártnui dan birra mot geaidnu viidáseappot berre leat olahan dihtii bistevaš ráfi Koreanjárgii. Maŋŋil su sártni, ságastalai Presideanta Moon olgoriikaministariin Eriksen Søreide. Ságastallama láidii Laura Bicker - BBC korrespondeanta Seoulas.

Presideanta Moon sárdnida Universitehta Aulas dan birra mot Koreanjárgii nagodit oažžut bistevaš ráfi ja stáđis dili. Govva: Ryan Kelly / NTB scanpix

Sárdni dollojuvvo juste jagi maŋŋil Singapore alimus dási čoahkkima, gos ožžo ođđa movtta bargat oažžut ráfi Koreanjárgii. Presideantta sárdni čujuhii maid ráfi soabadallančoahkkimii mii galgá leat Oslo Forumas boahtte vahku.

Musihkain Koreai

Maŋil ráđđehusa lunšša Akershus šloahtas, vulge Gonagas Harald,  Ruvdnaprinsa Haakon ja Prinseassa Astrid,  Ferner roavvá Bjørvika Operavissui. Doppe bovdii Korea Presideantabárra musihkain mátkkoštit Koreai.

Doppe besse návddašit árbevirolaš nuohtaid, dán áigásaš musihka ja K-pop  fenomena– mii lea koreanalaš  popmusihkka , mii lea máilbmái leavvan dego stoarbma. 

K-pop lea šaddan hui beakkánin maiddái Norggas, ja odne lei ge bárdnejoavku MONSTA X Operaviesu lávddis. Govva: Sven Gj. Gjeruldsen, Gonagaslaš hoavva

Guldaleaddjit besse maid gullat Sissel Kyrkjebø, gii šattai dovddusin Koreas álggugeahčen 2000-logu. Jung Jaeil loahpahii konseartaoasi «Spring Together» lávlagiin – lávlla ráfi birra.

Gonagaslaš guossit besse dearvvahit artisttaid maŋŋil konseartta.

Gállamállásat

Eahkes ledje gállamállásat Gonagaslaš šloahtas gudnin Korea presidentii ja vuosttašroavvái. Gonagas Harald rámidii Korea ja Presideantta 2018  Olympiija gilvvohallamiid lágideami ovddas:

- Geahččit miehtá máilmmi čuvvo stuora beroštumiin gilvvohallamiid, muhto Pyeongchang  lágideamit ovddastedje juoidá mii lea vel deháleabbo, deattuhii Gonagas.

- Du álggaheapmi, hearrá Presideanta, čájehii máilbmái mot gilvvohallan sáhttá hukset šaldi badjel riidduid ja politihkalaš soahpatmeahttunvuođaid. Guhkes áiggi eahpesihkkaris dili maŋŋil, beasai ráfálaš Koreanjárga guovvamánus 2018 sávvat máilbmái buresboahtima gilvvohallamiidda. Ja OL lágiduvvui ge ráfi vuoiŋŋain - dálvegilvvohallamiiguin.

Gonagas Harald. Govva: Heiko Junge / NTB scanpix

Gonagas deattuhii maid dan mearkkašanveara ovdáneami mii leamaš Korea Republihkas dan 60 jagis go dán guovtti riikkas leat leamaš diplomáhtalaš oktavuođat:

- Dan áiggis lea goappešat riikkain leamas earenoamáš buorre ekonomalaš ovdáneapmi. Dan áiggi rájes go ledje unnán resurssat, gitta buori birgejupmái ja ovdáneapmái. Korea Republihkka čuoččahii soađi billistemiin ja lea dál máilmmi 11. stuorámus ekonomiija. Mii ovddošit go dii nu jođánit lehpet ovdánan buresbirgejeaddji demokráhtalaš riikan.

Ruvdnaprinsa Haakon ja vuosttašroavvái Kim Jung-sook. Govva: Heiko Junge / NTB scanpix

Guossástallan joatkašuvvá

Ihttin joatká stáhtaguossástallan Bergenis. Gonagas Harald čuovvu Presideantabára Bergenii, gos sii galget fitnat mariidnafatnasis KNM Maud ja konsearttas Edvard Griegs Troldhaugen.