Stáhtaguossástallan Chiles

Lea Chile presideanta,Eksellense hearrá Sebastián Piñera Echenique guhte lea bovden guossástallamii. Lea vuosttaš geardi go Majestehtaguovttos Gonagas ja Dronnet leaba stáhtaguossástallan mátkkis doppe. Muhto Gonagas Olav lei doppe stáhtaguossástallamis 1967:s, ja Gonagaslaš Allavuohta Ruvdnaprinsa Haakon lei almmolaš guossástallamis 2008:s.

Vuosttaš oassi Gonagasbára guossástallamis čađahuvvo Chile oaivegávpogis, Santiagos, gos stuora vuostáiváldinseremoniija vurddii Gonagasa ja Dronnega. Muhto buot ovddemus bijaiga Gonagas Harald ja Dronnet Sonja lieđđekránssa Chile našunálmonumeantta lusa.

Gudnin Chile riikaáhččái

Bernardo O'Higgins jođihii spánskka koloniijafámus luovosinbeassansoađi, ja su leat ge navdán Chile riikaáhččin. Go riika gulahii iešheanalašvuođa jagis 1818, de šattai friddjandahkansáŋgár O'Higgins Chile vuosttaš stáhtaoaivámuš. Su gudnin lea dat stuora monumeanta ceggejuvvon olggobeallái presideantapalassa, man lusa Gonagasbárra bijai lieđđekránssa allaáiggálaš seremoniijain eske beaivet.

Gonagas bidjá lieđđekránssa Chile riikaáhči, Bernardo O'Higgins, muitomearkka lusa. Govva: Heiko Junge, NTB scanpix

Maŋŋá dan seremoniija finaiga Gonagas ja Dronnet hávdelanjas gosa Bernardo O'Higgins lea hávdáduvvon. Hávdelatnja lea Plaza de la Ciudadania vuolde. Dan sajis leat maid ollu Chile deháleamos institušuvnnain.

Gonagasbárra láidesteddjiiguin Bernardo O'Higgins hávdebáikkis. Govva: Tom Hansen, Hansenfoto.no

Buresboahtinseremoniija

Buresboahtinseremoniija lágiduvvui olggobealde Presideantašloahta, La Moneda. Doppe sávai Presideanta Piñera ja Chile vuosttašroavvá, Cecilia Morel Montes Gonagassii ja Dronnegii buresboahtima. Gonagas Harald inspiserii gudnigardena ovdal go goappešat riikkaid našunálalávlagat čuojahuvvot.

 Presideanta Sebastián Piñera ja Chile vuosttašroavvá, Cecilia Morel Montes sávaiga buresboahtima Gonagasbárrii. Govva: Heiko Junge, NTB scanpix

Gonagasbárra presenterii norgalaš váldodelegašuvnna Presidentii, ja Presideanta fas presenterii Chile delegašuvnna Gonagasbárrii ja  sudno čuovusjovkui. Maŋŋá buresboahtinseremoniija manne sii Presideantapalassii gos Gonagasbárra ja Presideantabárra  besse ságastallat. Dasto ledje delegašuvnnaid čoahkkimat. Olgoriikaministtar Ine Eriksen Søreide ja guolástusministtar Harald T. Nesvik leaba Gonagasbára mielde guossástallanmátkkis, ja dasa lassin vel stuora ealáhusdelegašuvdna mii ovddasta norgga servodat-ja kultureallima. Juo vuosttaš beaivvi čoahkkimiid maŋŋá vuolláičállojuvvo máŋga ovttasbargosoahpamuša.

Áhpegáttiid našuvnnat

Gonagas ja Dronnet leigga Presideantabára lunšaguossin La Monedas. Sártnistis guossoheddjiide čujuhii Gonagas Harald dasa man ollu dan guovtti riikkas lea mii lea oktasaš, ja ollu das mii lea oktasaš guoská dasa ahte lea lagasvuohta áhpái.

"Chile ja Norga leat našuvnnat mat ellet áhpegáttis -  ja das maid ábis sáhttit oažžut birgejupmái. Min riikkat ipmirdit dan man ollu dat mearkkaša ahte hálddašit dieid dehálaš riggodagaid jierpmálaččat, logai Gonagas. Son deattuhii maid Norgga ja Chile ovttasbarggu mearkkašumi multinašuvnnalaš oktavuođain ja internašuvnnalaš organisašuvnnain.

Gonagas Harald ja Presideanta Pinera lágideigga oktasaš preassadeaivvadeami maŋŋá čoahkkimiid. Govva: Heiko Junge / NTB scanpixGonagas Harald  ja Presideanta Pinera lágideigga oktasaš preassadeaivvadeami maŋŋá čoahkkimiid. Govva: Heiko Junge / NTB scanpix

Norga ja Chile ovttasbargaba hui bures internašuvnnalaččat, ja dan guovtti riikkas leat ollu oktasaš beroštumiid. Dat guoská eandalii ON bargui olahit nanu guoddevaš ulbmiliid mihtomeriide ja nanu áhpehálddašeapmái. Ságastallamiid ollu fáttat ledje ovdamearkkadihte Antárktalaš guovllut, elektrihkalaš mobilitehta ja dásseárvu. 

Kongreassa ja Alimusriekti

Eahkes, norgga áiggi mielde, fitná Gonagasbárra Chile Alimusrievttis. Doppe soai galgaba deaivvadit alimusrievtti justitiariusiin Haroldo Osvaldo Brito Cruz. Dasto mannet sii Kongressii, gos Gonagasbárra beassá deaivvadit goappáge gámmáriid jođiheddjiiguin parlameanttas.

Dat čoahkkin lea boares kongreassagárdimis Santiagos. Doppe lei Kongreassa gitta dassážii go šadde militeara fámu vuollái 1973:s. Gárdin lea maŋit áiggi nammaduvvon našunála monumeantan, ja vaikko Kongreassa lea ge sirdojuvvon Valparaísoi, go ožžo fas demokráhtalaš stivrejumi 1990:s, de leat goappešat gámmáriin gussiid vuostáiváldinlanjat dien boares gárdimis.

"A taste of Norway"

Go dáppe ruovttus lahkonišgoahtá gaskaidja, de lágidit norgalaš ja Chile ealáhusaid ovddasteddjiide mállásiid, gos  Gonagas ja Dronnet leaba fárus. Norgga borramušat guossohuvvojit, ja njeallje norgalaš nástegoahka leat doppe málesteamen ja guossoheamen biepmuid gussiide.Gonagas Harald lunššas Presideantašloahtas. Govva: Tom Hansen, Hansenfoto.no  

Chile lea nubbin deháleamos márkan Norgga fitnodagaide mat doibmet Latin-Amerihkkás. Ihttá prográmmas leat sihke ealáhusat ja kultuvra.