Gonagas ja Ruvdnaprinsa hárjehallamis

Gonagassii ja Ruvdnaprinsii čilgejedje hui viidát Trident Juncture  militearahárjehallama birra- mii lea stuorámus NATO- hárjehallan Norggas 1980-logu ja galbma soađi áiggi rájes. Militearahárjehallamis leat birrasii 50 000 soalddáha, 250 áibmofievrru, 65 skiippa ja 10 000 eatnan-alde soahtefievrrut 31 našuvnnain. Militearahárjehallamat leat eanas Trøndelagas, Møre ja Romsdal, Oppland, Hedmark ja Østfold fylkkain, ja maiddái áimmus ja Ruoŧa ja Suoma mearaguovlluin. Gonagas Harald ja Ruvdnaprinsa Haakon finaiga militearahárjehallamis Plassjes.

Gonagas ja Ruvdnaprinsa Trident Juncture 2018 NATO-hárjehallamis . Govva: Sven Gj. Gjeruldsen, Gonagaslaš hoavva

Gonagas ja Ruvdnaprinsa beasaiga gullat ahte hárjehallamis besset maid geahččalit oppalaš riikkasuodjaleapmi, mas oaidná oktiibuot árjaniid maiguin našuvdna nákce iežas suodjalit heahtedilis ja soađis – sihke militeara ja siviila suorggis. Jus  šaddá duođalaš heahtedilli, de dárbbaša siviilaservodat Suodjalusa, ja Suodjalus dárbbaša siviila servodaga.  Heahtedilli dahje riidodilli boahtá guoskkahit ollu siviila ámmátjoavkkuid ja surggiid. Earet eará dearvvašvuođasuorggi, sáhtuid ja logistihka, biebmoindustriija, media ja huksen ja rusttethoidduid – ja buot diet galget ge maid hárjehallat ja geahččaluvvot Trident Juncture hárjehallamis.

Gonagas Harald ja Ruvdnaprinsa Haakon deaivvadeigga Davvi Brigade Artelleribataljovnna soalddáhiiguin. Govva: Thorbjørn Liell / NTB Scanpix

Go leigga beassan gullan hárjehallama birra, de mátkkošteigga Gonagas Harald ja Ruvdnaprinsa Haakon Glåmosii, ja doppe deaivvadeigga soai Davvi Brigade Artelleribataljovnna soalddáhiiguin. Dien guovtti njealjenásttat generálas lei buorre dilli ságastallat hárjehalli soalddáhiiguin daid gáibideaddji hástalusaid mat leat Trident Juncture hárjehallamis.

Gonagas Harald ja Ruvdnaprinsa Haakon deaivvadeigga Davvi Brigade Artelleribataljovnna soalddáhiiguin. Govva: Torbjørn Kjosvold, Suodjalus

Glåmosas jotkkii Gonagas mátkki Værnesii olggobealde Troandima deaivan dihte  Royal Marines soalddáhiid. Ruvdnaprinsa mátkkoštii Tolgai, gos son deaivvadii ruoŧa Suodjalusa soalddáhiiguin, mat maid leat mielde dán militearahárjehallamis. Ruvdnaprinsa searvá maid ieš aktiivvalaččat hárjehallamii odne eahkes.

Ruvdnaprinsa searvá hárjehallamii disdaga, maŋŋel go lea idjadan telttes meahcis ovttas soalddáhiiguin.