Davviriikkaid Ráđi girjjálašvuođabálkkašupmi

Ruvdnaprinseassa Mette-Marit beasai iluin addit bálkkašumi girječállái Auður Ava Ólafsdóttir Ör girjji ovddas. Juohkin eavttuid daddjojuvvo:

"Davviriikkaid Ráđi 2018 girjjálašvuođabálkkašupmi addojuvvo girjái mas lea dievva leaika ja ealli giella, ja mas seammás maid leat čiekŋalis gažaldagat eallima ja jápmima birra."

Ör lea Auður Ava Ólafsdóttirs viđat romána. Son lea maid čállán diktačoakkáldaga, neaktinbihtáid ja lávllateavsttaid muhtun islándalaš čuojahanjovkui. Son lea riegádan Reykjavíkas 1958:s  ja lea leamaš dáiddadiehtaga ja dáiddahistorjjá oahpaheaddjin Islándda universitehtas ja Islándda teáhterskuvllas.

Ruvdnaprinseassa Mette-Marit sávvá lihku Islándda girjáčállái Auður Ava Ólafsdóttir Davviriikkaid Ráđi girjjálašvuođabálkkašumiin 2018. Govva: Terje Pedersen / NTB Scanpix

Ávvudedje davviriikkalaš kultuvrra

Gonagaslaš Allavuohta Ruvdnaprinsa lei maid bálkkašumiid juohkindilálašvuođas, gos ávvudedje buoremus davviriikkalaš kultuvrra ja birrasa. Girjjálašvuođa bálkkašupmi juogaduvvo seammás Davviriikkaid Ráđi bálkkašumiin mánáid – ja nuoraidgirjjálašvuhtii, musihkkii, filmmaide ja birasbargguide. Davviriikkaid Ráđi čakčačoagganeapmi lea Norggas dán vahku, ja dieid alladit árvvus adnojuvvon bálkkašumiid juohkin lea okta čoagganeami alimus áššiin.

NRK TV sáddii bálkkašumiid juohkima. Linda Eide ja  Hans-Olav Brenner leigga prográmmajođiheaddjit. Musihkkárat ledje Susanne Sundfør, Dagny, Jarle Bernhoft, Marja Mortensson, Jan-Erik Gustafsson, Operakoara ja KORK. 

Marja Mortensson lávddis bálkkašumiid juohkinseremoniijas Operas Govva: Sven Gj. Gjeruldsen, Gonagaslaš hoavva

Alladit árvvus adnojuvvon bálkkašupmi

Davviriikkaid Ráđi girjjálašvuođabálkkašupmi lea juogaduvvon 1962 rájes, ja addojuvvo čáppagirjjálaš girjái mii lea čállojuvvon muhtun davviriikkaid gielaide. Dat sáhttá leat romána, neaktinbihttá, diktačoakkáldat, noveallačoakkáldat dahje essayačoakkáldat masa leat alla girjjálašvuođa gáibádusat. Bálkkašumi ulbmil lea nannet beroštumi ránnjáriikkaid girjjálašvuhtii ja gielaide ja nannet davviriikkalaš kulturoktiigullevašvuođa.

Ruvdnaprinseassa giittii Davviriikkaid Ráđi ja girječálliid girjjiid ovddas maiguin sii áiggiid čađa leat rahpan min čalmmiid, danin go:

- Davviriikkaid Ráđi girjjálašvuođa bálkkašumis lea áibbas earenoamáš posišuvdna. Dat lea áiggiid čađa lokten ovdan muhtun min fiidnámus girječálliin. Almmá Davviriikkaid Ráđi čuovgga haga livččen mun ja duháhiid mielde eará lohkkit manahan dehálaš girjjálašvuođa ja stuora lohkanvásáhusaid.

Davviriikkaid Ráđi girjjálašvuođabálkkašumi 2018 oaččui Islándda Auður Ava Ólafsdóttir. Govva: Terje Pedersen / NTB Scanpix

Oktiibuot ledje 13 girječálli nominerejuvvon dán jagi girjjálašvuođabálkkašupmái:

• Danmárkkus: Caroline Albertine Minor: Velsignelser jaVita Andersen: Indigo
  
  
• Suomas: Susanne Ringell: God morgon jaOlli-Pekka Tennilä:Ontto harmaa
  
  
• Fearasulluin: Jóanes Nielsen: Gudahøvd
  
  
• Ruonáeatnamis: Magnus Larsen: Illinersiorluni ingerlavik inussiviuvoq
  
  
• Islánddas: Auður Ava Ólafsdóttir: Ör jaSigurður Pálsson: Ljóð muna rödd
  
  
• Norggas: Roskva Koritzinsky: Jeg har ennå ikke sett verden ja Carl Frode Tiller: Begynnelser
  
  
• Ruoŧas Gunnar D. Hansson: Tapeshavet ja Agneta Pleijel: Doften av en man
  
  
• Ålánddas: Carina Karlsson: Algot

Eará  bálkkašumit

Maiddái stáhtaministtar Erna Solberg beasi juohkit bálkkašumi odne eahkes. Son attii birasbálkkašumi Attu Luondduresursaguvlui Ruonáeatnamis, dan barggu ovddas maid sii leat čađahan dokumenteret ja gaskkustit báikkálaš olbmuid máhtu ja vásáhusaid mearabirrasa birra.

Erna Solberg addá Davviriikkaid Ráđi birasbálkkašumi Attu luondduresursa birrasii. Govva: Terje Pedersen / NTB Scanpix

Neavttár Jakob Oftebro jugii Davviriikkaid Ráđi filbmabálkkašumi filbmii Kona fer í stríð, Islánda.

Gunilla Bergström, girječálli ja Albert Åberg girjjiid sárgu, jugii Davviriikkaid Ráđi mánáid-ja nuoraidgirjjálašvuođabálkkašumi Fearasulluid girječállái Bárður Oskarsson. Girjealmmuheaddji vuostáiválddii bálkkašumi vuoiti ovddas.

Lávlu ja komponista Sofia Jernberg jugii Davviriikkaid Ráđi musihkkabálkkašumi norgalaš komponistii ja organistii Nils Henrik Asheim  su Muohta (Snø) komposišuvnna ovddas.

Norgga Nils Henrik Asheim oaččui Davviriikkaid Ráđi musihkkabálkkašumi 2018. Govva: Terje Pedersen / NTB Scanpix

Maŋŋel bálkkašumiid juohkima beasai Ruvdnaprinsabárra dearvvahit bálkkašumiid vuitiid.