Viidáseappot Kråangke ja Namsosii

Soai leigga álggahan guossástallama Høylanddas ja Namsskoganis, ja dan maŋŋá mátkkošteigga Gonagaslaš Allavuođaguovttos Ruvdnaprinsa ja Ruvdnaprinseassa viidáseappot Kråangke ja Namsos suohkaniidda. Doppe vurde ođđa kulturvásáhusat.

Kråangke ođđa kulturviessu

Kråangkes oaččui Ruvdnaprinsabárra vejolašvuođa searvat suohkana ođđa kulturviesu,Kuben, almmolaš rahpamii.

Ruvdnaprinseassa Mette-Marit doalai rahpansártni, ja čujuhii dasa man viiddis doaimmaid kulturviessu sisttisdoallá:
- Dii lehpet ásahan saji dáidagii, teáhterii, musihkkii, filmmaide ja girjjálašvuhtii, falástallamii ja oahpahussii, dakko  bokte ahte lehpet earaládje smiehttan boares ja ođđa áiggi birra, ja go lehpet ovttastahttán iešguđetlágan dárbbuid, sávaldagaid ja vejolašvuođaid; ovtta ja seamma báikái.

Girjerádjosis, guovdu Kubena, čoahkkanedje mánáidgárdemánát Ruvdnaprinsabára birra.  Lei lohkanbottu áigi. Sihke Ruvdnaprinsa ja Ruvdnaprinseassa logaiga jitnosit mánáide.

Ruvdnaprinsabárra logai jitnosit Kari Stai girjjis Jakoba birra, mii lohká "juo" juohke diŋgii, ja Neikob mii dadjá ges "ii". Govva: Berit Roald, NTB Scanpix.

Loahpas sii manne  "Symfoni Namsen" konseartasálii. Doppe beasai Ruvdnaprinsabárra návddašit čájáhusa "Farger i Grong" mii čalmmustahttá dan ahte Kråangke lea šaddan máŋggakultuvrralaš suohkan. Ruvdnaprinseassa rámidii suohkanássiid go nu liekkusvuođain leat vuostáiváldán báhtareddjiid.

Rock City - Namsos

Namsosas finai Ruvdnaprinsabárra álggos "Verdensrommet" visttis – mii lea Åge Alexandersena boares garáša. Garáša lea Rock City museas, ja das leat buot stohpobiergasat,, CD'at ja eará viessodávvirat, ja govvida mo buot álggii okte: Dies riegádii beakkán trønderrocka.

Ja dasto lei konsearta NTE Arenas ja praktihkalaš čilgen fáttá birra. Ollu beakkán čuojaheaddjijoavkkut ja soloartisttat leat eret Namsosas ja Trøndelagas, ja eahkes beasai Ruvdnaprinsabárra deaivvadit muhtumiiguin sis.

Namsos suohkan streamii dan ja sáddii njuolga Facebookas.

DDE rabai konseartta "By'n æ bor i" lávlagiin- mas maid gullostalai "Ja vi elsker".  Dasto manai Ruvdnaprinsa Haakon lávdái ovdal go konsearta joatkašuvai. - Mii leat dál trønderrocka gárdimis, nannii Ruvdnaprinsa. - Trønderrock doaba riegádii 1972:s, ja dat musihkkastiila ovddastii juoidá ođđasa dáru musihkas. Musihkka gal vejii boahtán juostá eará báikkis, muhto teavsttat gal vulge dáppe, ja lávlojuvvo troandingillii.

Konseartta fátmmastii viidát, ovddeš áiggiid ja trønderrocka boahtteáiggi. Namsos-nieida Amanda Kamara bođii lávdái maŋŋá Ruvdnaprinsa Haakona, ja su maŋŋá bođii Grannes og Trøndergospel, čájehuvvui historjjálaš Prudence filbma ja dasto vel eanet artisttat.

DDE álggahii – ja loahpahii konseartta – ollu iežaset dovddus lávlagiiguin. 

Mátki joatkkašuvvá...

Ihttin joatká fylkkamátki Fosnes ja Flatanger suohkaniidda