Álggahanfitnodagat ja ságágirjjálašvuohta

Nuppi beaivvi prográmma Eksellense Presideantta Guðni Th. Jóhannesson ja su roavvá Eliza Reid stáhtaguossástallamis fátmmastii sihke dutkama, fitnodagaid mat leat álggahandásis ja ságágirjjálašvuođa. Beaivvi prográmma álggii eske iđđes Dutkanpárkkas.

Dutkan gávnnada ealáhusaiguin

Gonagasbárra ja Presideantabárra álge otná prográmmain Dutkanpárkkas Oslos.  Dieppe deaivvadit dutkan, oahppu ja ealáhusdoaimmat, ja ožžot nuppi nuppis ávkki.  Dien báikkis doibmet birrasii 240 fitnodaga, dutkanjoavkku ja instituhta. Okta dain lea StartupLab.

StartupLab. Govva: Heiko Junge / NTB scanpix

StartupLab jođiha islándalaš Lauga Óskarsdóttir, ja lei ge son guhte muitalii dien doaimma birra gussiide.  Guossit besse geahčadit laboratoria ja oaidnit movt iešguđetlágan prošeavttaiguin barget. Guossit besse maid deaivvadit sihke islándalaš studeanttaiguin ja maiddái bovren -robohtain.

Ságáskeaŋka

Maŋŋá guossástallama Dutkanpárkkas, beasai direktevra Aslak Sira Myhre sávvat Presideantabárrii ja Gonagasbárrii buresboahtima Našunálagirjerádjosii. Islándalaš ságágirjjálašvuohta lea guossástallamis guovddážis. 

- Diehtu Norgga historjjá birra livččii leamaš mihá unnit jus mis eai livčče islándalaš teavsttat. Daid teavsttaid haga livččii mis hui unnán diehtu norrøna mytologiija birra  –  ja diehtu máilmmi girjjálašvuođa birra  livččii leamaš vel geafit, logai Gonagas Harald iežas sártnis Presideantabárrii ikte eahket.

Jagis 2014 almmuhii Saga lágádus Reykjavikas Islándalaš ságámuitalusaid, vuosttaš geardde dievaslaš almmuheapmin, sihke dárogillii, ruoŧagillii ja dánskagillii.  Gonagas Harald čálii ovdasáni dáru almmuheapmái. Odne buvttii olgoriikaministtar Guðlaugur Þór Þórðarson stuora skeaŋkka Islánddas: 500 almmuhusa dan viđa girjji sturrosaš muitalusráiddus.  Buot Norgga álbmotgirjerádjosat galget oažžut dakkára, ja girjerádjosat main leat ollu nuorra girjeluoikkaheaddjit galget oažžut guokte. 

Kulturministtar Linda Hofstad Helleland  vuostáiválddii Islándda skeaŋkka Norgga girjerádjosiid ovddas. Govva: Sven Gj. Gjeruldsen, DKH.

Hárvenaš girjjit

Presideantabárra ja Gonagasbárra besse oaidnit Našunálagirjerádjosa čoakkáldaga vuorkkáid, maid ledje dán dilálašvuhtii ohcan. Vuosttaš láseskábe siste lei ovdamearkkadihte «Norske Kongers Krønicke oc bedrifft: indtil unge Kong Haagens tid, som døde Anno Domini 1263». Dien girjái leat čohkkejuvvon muhtun oasi gonagasságáin, jorgaluvvon boaresdárogielas dánskagillii 1540-logus, ja dáidá leat  vuosttaš prentejuvvon girji mii sisttisdoallá norrøna ságáteavsttaid. 

Presideantabárra ja Gonagasbárra besse oaidnit Našunálagirjerádjosa čoakkáldaga vuorkkáid, maid ledje dán dilálašvuhtii ohcan. Govva: Håkon Mosvold Larsen / NTB scanpix

Guossit besse  maid oaidnit 1899-prentejuvvon Snorre Gonagasságáid – mas leat dovddus illustrašuvnnat ja lea okta dain eanemus mearkkašahtti girjjiin Norgga girjjálaš dáidagis.

Almmolaš lunša

Presideanta Guðni Jóhannesson ja stáhtaministtar Erna Solberg doalaiga čoahkkima ovdalaš Ráđđehusa lunšša, mii lágiduvvui gudnin Presideantabárrii. Dat lei Akershus šloahtas, ja sihke Gonagasbárra ja Ruvdnaprinsabárra ledje gussiid searvvis.

Akershus šloahtas. Govva: Heiko Junge / NTB scanpix

Maŋŋá lunšša finaiga Presideanta Jóhannesson ja su roavvá Reid Ólafíustofa – islándalaš girkus Norggas.

Vuostáiváldin

Odne veaigin leat islándalaččat bovdejeaddjin. Gonagasbára, Ruvdnaprinsabárra ja Prinseassa Astrid, Ferner roavvá, leat Presideantabára guossin vuostáiváldimis Astrup Fearnley Museas.

Odne eahkes vuolgiba Presideanta Jóhannesson ja su roavvá Reid viidáseappot Bergenii, gos stáhtaguossástallama maŋemus beaivi galgá čađahuvvot. Gonagas Harald galgá čuovvut Presideantabára prográmma Bergenis. Sii galget earet eará fitnat dáin báikkiin: Bergen Vitensenter, Norsk Havlaboratorium ja Bergen Universitehtas.