Islándda stáhtaguossit
Odne vuostáiválddii Majestehta Gonagas Eksellense Presideanta Guðni Th. Jóhannesson ja su roavvá Eliza Reid Šloahttašiljus. Islándda presideantabárra álggahii golmma beaivásaš stáhtaguossástallama Norggas.
Sihke Majestehta Dronnet ja Ruvdnaprinsabárra ledje mielde sávvamin Islándda presideantabárrii buresboahtima. Lea goalmmát gearddi go Islánddas bohtet stáhtaguossástallamii Norgii Gonagas Haralda ráđđehusáiggis. Ólafur R. Grimsson lei stáhtaguossástallamis Norggas 1997:s ja Vigdis Finnbogadóttir lei 1992:s.
Guossástallan nanne daid buriid oktavuođaid mat leat gaskal Islándda ja Norgga. Guovddážis dáid beivviid lea min oktasaš kulturárbi ja kultuvrra, oahpu, dutkama ja innovašuvnna surggiid ovttasbarggu viidáseappot ovddideapmi.
Buresboahtinseremoniija
Allaáiggálaš seremoniija Šloahttašiljus lea árbevirolaš álgu buot stáhtaguossástallamiidda Norggas. Odne libardedje Šloahttašiljus Islándda ja Norgga leavggat, ja leavggat libardedje maid Šloahttaluohkás vulos ja Karl Johan gáhtas.
Gonagaslaš Allavuohta Ruvdnaprinsa Haakon láidestii Presideantta Jóhannesson ja su roavvá Reid Šloahttašilljui gos Gonagas Harald vuostáiválddii sudno.
Loddesálas. Govva: Berit Roald, NTB scanpix
Majestehta Gonagasa Garde čuojahii Islándda ja Norgga našunálalávlagiid, ja dasto inspiserii Presideanta Jóhannesson gudnikompaniija, ovttas Gonagas Haraldiin. Dasto presenterejedje Presideantabára almmolaš Norgga ovddasteddjiide. Soai asttaiga maid humadit Norgga islándalaš birrasa ovddasteddjiiguin, ja muhtun mánáiguin geat ledje boahtán čuovvut seremoniija.
Šloahta siste vurddii Prinseassa Astrid, Ferner roavvá, ja buohkat serve govvemii Loddesálas, ja dan maŋŋá lei skeaŋkkaid addin Vilges sálas.
Lieđđekránssa bidjan
Maŋŋá buresboahtinseremoniija láidestii Gonagas Harald Presideantta Jóhannesson Akershus ladnái, gos Presideanta bijai lieđđekránssa Našunálamonumeantta lusa, muitun sidjiide geat gahčče 2.máilmmisoađis. Dronnet Sonja ja Reid roavvá čuovuiga maid dan seremoniija, gos Presideanta maid inspiserii Garden gudnikompaniija.
Lieđđekránssa bidjan. Govva: Sven Gj. Gjeruldsen, Gonagaslaš hoavva.
Frankfurt 2019
Frankfurt girjemeassu lea máilmmi stuorámus márkan girjjálašvuođa ja media suorggis. Dat lágiduvvo golggotmánu juohke jagi, ja juohke jagi loktejuvvo okta riika váldoriikan. 2019:s lea Norga válljejuvvon váldoriikan, ja beassá ge de čájehit doppe min riika girjjálašvuođa ja kultuvrra meassuin mii čohkke badjel 10 000 journalistta, 7000 lágádusaid ja 300 000 gussiid.
NORLA. Govva: Berit Roald, NTB scanpix
NORLA - Norwegian Literature abroad - bargá norgalaš girjjálašvuođain ja lea plánemin Frankfurt lágidemiide searvama. NORLA lea válljen islándalaš Halldór Gudmundsson prošeaktajođiheaddjin dieid stuora meassuide. Son jođihii dien barggu maiddái dalle go Islánda lei váldoriikan, 2011:s, ja sus lea ge dasto buorre gelbbolašvuohta ja máhttu. Ja odne son muitalii ge prošeavtta birra Gonagasbárrii ja Presideantabárrii ovttas NORLA direktevrrain Margit Walsø. Min girjjálašvuođa berošteaddji Ruvdnaprinseassa lei maid fárus dán guossástallamis.
Logaldallamat ja beavdeságastallan
Islándda presideantabárra lea maid finadan sárdnestuolus odne. Álggos lei Eliza Reid. Dronnet Sonja čuovui su Oslo Universitehtas, gos vuosttašroavvá doalai sáhkavuoru semináras mii lei bargosajiid dásseárvvu birra. Su sáhkavuoru "I dare, I can, I will: The Challenges and victories of gender equality in the Icelandic workplace" maŋŋá lei beavddebirra ságastallan mas maiddái Reid roavvá lei fárus.
Veaigin lei ges Presideantta Jóhannesson vuorru. Son doalai sáhkavuoru loahpas "Global Challenges - Nordic Experiences" konferánssa Universitehta aulas. Sihke Gonagasbárra ja Reid roavvá ledje doppe gullamin Presideantta sáhkavuoru "What Challenges? What opportunities? The future of the Nordic model".
Gállamállásat
Eahkes leat gállamállásat Gonagaslaš šloahtas gudnin Islándda gussiide. Sihke Gonagas Harald ja Presideanta Jóhannesson doallaba sártni mállásiid oktavuođas, gos guossohit borramušaid maid Šloahta gievkkan lea ráhkadan Norgga biebmoávdnasiin. Mii guossohuvvo, dat almmuhuvvo diibmu 20.00, seammás go guossit čohkkedit beavdái.
Govva: Jon Eeg, NTB scanpix
Ruvdnaprinsabárra ja Prinseassa Astrid, Ferner roavvá, leat diehttelas guossit, ovttas almmolaš Norgga ovddasteddjiiguin. Mállásiin leat guossit geain kultuvrra, politihka, dutkama, oahpu dahje gávppašeami bokte leat čanastagat Islándii. Oktiibuot lea lágiduvvon sadji 184 guossái Šloahta stuora boradansálii odne eahket.
Juogat dán artihkkala Twitteris ja Facebookas:
Juogat dán artihkkala Twitteris Juogat dán artihkkala FacebookasÁigeguovdilis áššit
![Gonagaslaš hoavva ovdanbuktá 2023 jahkeraportta](/aim/kongehuset2/files/6/c/a/d1585e8eb09c6bad0d26e562e85fc6620086a74616/6cad1585e8eb09c6bad0d26e562e85fc6620086a74616.jpg/Scale/Crop?Scale:geometry=>721x915&Crop:geometry=700x700%2b0%2b144)
Gonagaslaš hoavva ovdanbuktá 2023 jahkeraportta
Gonagasviesu doaimmat diibmá speadjalastet otná Norgga. Gonagasbearraša mátkkit 47 suohkanii, almmolaš galledeamit viđa eurohpalaš riikkain, iešguđetlágan lágideamit ovttas riikka suodjalusain ja riikka gearggusvuođa guovdilastin, čájeha mii lea dehálaš Norgii ja masa gonagasbearaš lea bidjan návccaid.
![Lihkusávaldagat Dánmárkku ođđa gonagasbárrii](/aim/kongehuset2/files/a/6/d/2417f2b3f05ab14e844edc3b763c9659fe8f8bb7f1/a6d2417f2b3f05ab14e844edc3b763c9659fe8f8bb7f1.jpg/Scale/Crop?Scale:geometry=>788x1050&Crop:geometry=700x700%2b46%2b14)
Lihkusávaldagat Dánmárkku ođđa gonagasbárrii
Majestehta Gonagas Harald cealká liekkus lihkusávaldagaid Majestehta Gonagas Frederik X ja Majestehta Dronnet Mary guoktái truvdnolotnahuvvama oktavuođas Dánmárkkus.