Loahpaheapmi St. John's gávpogis

St. John's -  Newfoundland ja Labrador provinsaoaivegávpot – lea seamma govdodatgrádas go Paris. Liikká leat doppe oalle earalágan dálkkit,  ja áhpeguovlluin lea máŋgga dáfus seammalágan hástalusat go Barentsábis. Norggas ja Canadas lea lagas ovttasbargu gearggusvuođasuorggis ja offshoredoaimmain.

Sihkarvuohta ja gearggusvuohta Árktalaš guovllus

Gonagaslaš Allavuođaguovttos Ruvdnaprinsa ja Ruvdnaprinseassa álggaheigga otná beaivvi norgalaš – kanadalaš seminárain sihkarvuođa ja gearggusvuođa birra Árktalaš guovllus.  Fáddán lei sihkarvuohta, offshore, gádjunoperašuvnnat ja gearggusvuohta oljolihkuhisvuođaid oktavuođas.

Jiekŋaváriid hálddašeapmi lea okta hástalusain mainna offshore- bargit deaivvadit davviguovlluin. Ruvdnaprinsabárra beasaiga oaidnit movt bargit hárjehallet oahppat geassit eret jiekŋaváriid mat lahkonit oljobohkanrusttegiidda. Ruvdnaprinsa Haakon beasai geahččalit darvvihit jiekŋavári suohpaniin.

Centre for Marine Simulation lea guhkit áiggi juo ovttasbargan Kongsberg Maritime Simulationiin,  ja dál geavahit ge lagabui 70 % sin simulatuvrrain Kongsberg teknologiija. Čovdosat dahket vejolažžan gárvvistit várálaš dilálašvuođaide, gávdnat čovdosiid ja hárjehallat operašuvnnaid.

Poláraidjii

Ođđajagis rahppojuvvo čájáhus "Polar Night: Light and Life in the Dead of Night" Johnson GEO CENTRE in St. John’s. Ruvdnaprinsa ja Ruvdnaprinseassa beasaiga dál juo oaidnit čájáhusa ovttas muhtun báikkálaš nuoraiguin. Čájáhus lea seavdnjadasas ja guossit ožžot lummalámppá.

Dát čájáhus, mii dutká polaábi eallima, lea ráhkaduvvon ovttas Romssa museain, ja dat lea čájehuvvo  ollu báikkiin sihke Canadas ja Norggas.

Poláraija guossástallan láidii Ruvdnaprinsabára seminárii gos áhpedutkan lei ságas.

Boahttevaš málesgárri

Dađistaga eanet olbmot leat dovddahišgoahtán dan man dehálaččat máilmmi ábit leat go smiehttá biebmisihkarvuođa. Norga ja Canada, mat leat riddonašuvnnat, sáhttet leat dehálaš doarjja addit, ja  leat ollu suorggit main sáhttá ovttasbargat. Goappešat našuvnnain lea áigumuš nannet áŋgiruššamiid.

 Johnson GEO CENTRE seminára čiekŋudahtii dan man dehálaš áhpi lea boahttevaš buolvvaide ja man dehálaš lea oažžut nanu čanastaga dutkama ja oahpu gaskii.

Girjjálašvuohta

Veaigin lei áigi molsut fáttá. Ruvdnaprinseassa Mette-Marit lea girjjálaš berošteaddji ja lohkanmiela áŋggirdeaddji,  ja hálida maid norgga girjjálašvuođa ovddidit olgoriikkain. St. John's gávpogis álggahii son sáhkavuoru norgga ja kanadalaš girjjálašvuođa birra. Ruvdnaprinseassa muitalii iežas  lohkanmovtta birra, iežas mátkki birra Girjjálaštogain ja man dehálaš girjjálašvuohta lea go galgá ieš iežas j earáid ipmirdit. Ollislaš sáhka maid Ruvdnaprinseassa doalai, gávdno Facebookas (geahča leaŋkalisttu).

Erlend Loes girji Doppler lea okta dain girjjiin mii johtá buoremusat Canadas. Duorastaga lei dát girječálli St. John's  lávddis ovttas kanadalaš girječálliin Ed Riche. Soai logaiga jitnosit ja ságastalaiga.  Lea ollu mii sulastahttá Doppler ja  Riche girjjis Today I Learned It Was You.  Goappešagat čálliba hui suohttasit dehálaš fáttáid birra, oalle seammaládje  goabbat ge  guovllus máilmmis.

Loahpaheigga

Ruvdnaprinsa ja Ruvdnaprinseassa loahpaheigga iežaska almmolaš guossástallama Canadas vuostáiváldimiin gos ledje norgalaš ja báikkálaš ealáhusaid ovddasteaddjit,geat besse doppe oahpásnuvvat. Norgalaš ja kanadalaš goahkat ledje ráhkadan borramušaid ja guossohedje Ruvdnaprinsabárrii mearabiepmuid.