Kulturgaskkusteapmi Torontos

Ruvdnaprinsa ja Ruvdnaprinseassa čuovuiga goabbatge seminára Toronto Universitehtas disdaga ovdalgaskabeaivvi, báikkálaš áiggi. Ruvdnaprinsa Haakon  čuovui musihkkaindustriija seminára ja Ruvdnaprinseassa fas seminára man fáddán lei girjesuorgi.

Norgga girjjálašvuohta olgoriikkain

Gaskariikkalaččat lea dál šaddagoahtán eanet beroštupmi norgga girjjálašvuhtii. Okta sivain dasa lea dat go Norga lea nammaduvvon gudniguossin stuora girjemeassuide - Frankfurt 2019 -  ja gieskat válljejuvvui Canada 2020 gudniguossin. Dat lei duogáš norgalaš – kanadalaš girjeseminárii Torontos, gos goappešat riikkaid ovddasteaddjit ledje čoahkkanan juogadit máhtu ja oahppat guhtet guimmiideaset vásáhusain. Lunddolaš oassi prográmma lei jorgaluvvon girjjálašvuohta.

Erlend Loe lea okta dain norgalaš girječálliin gean girjjit leat eanemus gielaide jorgaluvvon, muhtun su girjjiin leat jorgaluvvon eai unnit go 39  gillii.  Su girjjit leat maid almmuhuvvon Canadas, ja son juogadii iežas vásáhusaid doppe nugo lea daid vásihan girječálli bealis.

Brage bálkkašumi vuoiti Hilde K. Kvalvaag girjjit leat jorgaluvvon duiskkagillii, ja sus lea jurdda olahit earet eará kanadalaš girjemárkana. Ruvdnaprinseassa Mette-Marit jođihii ságastallama dieinna guvttiin girječálliin,  sudno girjjiid deháleamos fáttáid birra, mii sulastahttá sudno girjjiin ja makkár erohusat leat.  Ruvdnaprinseassa jearai maid sáhttá go Erlend Loe buktit makkárge rávvagiid Kvalvaagii dan hárrái movt buoremusat nagoda olahit internašuvnnalaš márkaniid.

Olles dát ságastallan gaskal Ruvdnaprinseassa ja dien guovtti girječálli gávdno min Facebook siidduin.

Musihkka gálvun

Canada lea bures lihkostuvvan iežas kulturindustriija vuovdalemiin olgoriikkaide. Sii leat ožžon sadjái buriid doarjagiid sihke artisttaide ja olles dán suorgái. Music Norway bargá norgga musihka vuovdalemiin olgoriikkaide, ja lei ge dán seminára lágideaddji ovttas báikkálaš fámuiguin.  Goappešat riikkaid ovddasteddjiin ledje sáhkavuorut sihke ruhtadeami, insentiivamálliid, vuovdinstrategiijaid ja investerenvejolašvuođaid birra.

Ruvdnaprinsa Haakon čuovui muhtun osiid semináras ja ságastalai oasseválddiiguin. Soai leaba Ruvdnaprinseassain áŋgirit searvan dan ságastallamii ahte movt Norgga kultuvrra buoremusat sáhtašii dovddusindahkat olgoriikkain. Norgga artista Ida Jenshus lei okta oasseváldiin, ja son lávllui lunšša oktavuođas.

Sosiála innovašuvdna

Maŋŋá lunšša vulggii Ruvdnaprinsabárra viidáseappot Ryerson universitehtii, gos fáddan lei sosiála innovašuvdna ođđa fuomášumit mat sáhttet čoavdit servodahkii ja birrasii guoskevaš dárbbuid. Sártnistis Ottawas čujuhii Ruvdnaprinsa Haakon dasa ahte Canada lea okta dain buoremus riikkain máilmmis gosa fitnodaga sáhttá ásahit. Innovašuvdnaláhčin lea vuođđun dasa ahte nagodit doalahit máilmmiekonomiija gilvalannávccaid boahttevuođas, na maid mii dasto sáhttit oahppat guđet guoimmisteamet?

Ryerson University Student Learning Centre  innovašuvdnasemináras digaštalle goappešat riikkaid modeallaid ja  movt dakkár áššit nugo dat ahte álkit ja govttolaš haddái oažžut buhtis energiija ja oahpu – movt dat sáhttet váikkuhit boahtteáiggi sosiála innovašuvdnii. Ruvdnaprinsabárra beasai maid oaidnit muhtun ođđa fuomášumiid ja ideaid.

"Kongens nei" 

Erik Poppe beakkán filbma "Kongens Nei" lea válljejuvvon Norgga filbman Oscar-bálkkašupmái. Disdateahket čájehuvvui filbma kanadalaš gehččiide vuosttaš geardde. Gallapremière lei TIFF Bell Lightbox  báikkis, ja lei ovttasbargu gaskal Paradox Film ja Toronto internašuvnnalaš filbmafestivála. Diet festivála lea okta máilmmi stuorámusain ja dehálepmosiin, ja doppe lea hui buorre vejolašvuohta dovddusindahkat norgga filmmaid internašuvnnalaččat.

Ruvdnaprinsa Haakon muitalii olbmuide veháš duogášdieđuid ovdal filmma, sihke persovnnalaš dieđuid ja historjjálaš, ja giitalii maid Toronto guossásvuođa 2.máilmmisoađi áiggi. Norgga soahtegirdivuddjiid hárjehallanbáiki  - Little Norway – lei juste dán báikkis.

- "My father, King Harald, visited Toronto and Little Norway several times as a small boy, when he was living in exile. The hospitality shown by this city at a crucial time in Norway’s history has given Canada and Toronto a special place in the hearts of Norwegians."

Toronta filbmageahččit liikojedje hui bures filbmii.