Álggaheigga ávvudanmátkki Romssas

Gonagasbára ávvudanmátki bistá geassemánu 18.beaivvi rájes gitta 29.beaivái geassemánus. Gonagasskiipa galgá luoitit áŋkora Romssas, Budejjus, Troandimis, Bergenis, Stavangeris ja Kristiansandas. Buot diein báikkiin galgá leat sihke gieddefeasta ja álbmotfeasta. Troandimis galgá dasa lassin vel leat ávvuipmilbálvalus Nidarosdomenis – beaivvát ala 25 jagi maŋŋá go Gonagasbárra sivdnádallojuvvui doppe, geassemánu 23.beaivvi 1991.

Gonagasbárra ollii "Davviriikkaid Parisii" ikte, ja odne álgá ge Ávvudanmátki.

Gieddefeasta Romssas

Gonagas ja Dronnet lágideaba gieddefeastta buot dan guđa gávpogis. Odne beasai Gonagas Harald sávvat buresboahtima gieddefestii Skansen ladnis, gosa ledje čoahkkanan 300 bovdejuvvon guossi buot guovlluin fylkkas. Gonagas muittašii sihke guollebivdomátkkiid, duottarmátkkiid, sabetbáhčin NM ja eará buriid muittuid mat Gonagasbáras leat Romssas maŋemus 25 jagiin.

- Nugo dii várra lehpet fuobmán jagiin mat leat vássán, de moai liikojetne hui bures Davvi-Norgii – ja fuobmájetne álo juoidá man dihte besse vuolgit finadit min davimus fylkkain. Danin lea ge áibbas lunddolaš munnuide álggahit dán mátkki dáppe Romssas. Moai várra vuorjjaime Finnmárkku doarvái diibmá, go leimme váldán mielde olles bearraša dohko vásáhusmátkái, gasku min iežamet ja earáid geasseluomu, logai Gonagas.

Gonagas Harald smiehtadii maid jitnosit daid nuppástusaid birra mat maŋemus 25 jagis leat dáhpáhuvvan.

- Moai Dronnegiin letne šaddan 25 jagi boarráseappot, muhto dan leat lihkus buot earát maid dahkan.
- Norga lea šaddan 25 jagi boarráseabbo. Norgga servodat ii leat šat seammalágan dál go lei dalle 1991:s.  Mis leat dál eará hástalusat, eará vejolašvuođat.  Mii leat vásihan buriid áiggiid ja heajut áiggiid. Muhto geažos áiggi mii doallat nannosit gitta muhtun árvvuin mat leat nannosat min kultuvrras, min báikkálaš servodagain, min váimmuin.

Go Gonagas ja Dronnet bođiiga Skansenii eske ovdalgaskabeaivvi, de sudno dearvvahedje doppe Lulli- Romssasullo  skuvlakorpsa ja Kulta sirkusmánát. Sirkusartisttat ráhkadedje suohttasiid gieddefeasttas, ja doppe guossohedje dan guovllu lagas borramušaid. Fylkkamánne Bård Pedersen ja Johanne Marlene Hansen,Romssa nuoraidráđi jođiheaddji, doalaiga sártni.

Rabai Labb ja Line-viehkama

Odne veaigin lágida Romssa suohkan feastta gávpotguovddážis. Lágideapmi lea oassi Midnight Sun Marathonas, mii lágiduvvo Romssa gáhtain odne 27.geardde.

- Dasa in áiggo buorelihkus searvat! Bogostalai Gonagas.

Ii Dronnet ge searvva dien viehkamii, muhto son galgá leat vuolggabáikkis Grønnegatas, gos galgá sáddet vuosttaš joavkku mánáid mánáidviehkamii, mii gohčoduvvo Labb-ja Line viehkan. Dan maŋŋá galgaba Gonagas ja Dronnet čuovvut viehkama moallabáikkis ja hupmat mánáiguin geat jovdet mollii.

Maŋŋá viehkama lea čoagganeapmi Stortorget tribunas, ja Midnight Sun Marathon jođiheaddji Nils I. Hætta áigu muitalit veaháš maratonviehkama birra Gonagasbárrii. Dan maŋŋá lea stipeandajuohkin ja Romssa sátnejođiheaddji Jarle Aarbakken sárdni.

Vuosttaš ávvubeaivvi loahpaha sámi elektropopartista Agnete Båtnes Braaten, gean artistanamma lea Ágy.   Maŋŋelaš veaigin vuolgá Gonagasskiipa Budejju guvlui, gos Ávvudanmátki joatká ihttin.