Čájáhusrahpan Dronnet Sonja DáiddaStáljas

– Buorre, nanu giehtaduodji dievasmahttá funkšuvnna, dat gokčá dárbbuid ja das lea erenoamáš čábbodat. Dat lea veahkkin ráhkadit buriid, čáppa árgabeivviid ja maiddái meassuid, go leat dávvirdat maid geavahit jahkeviissaid. Dat leat dávvirat mat šaddat deháleabbon ja eanet mearkkašahttin áiggi mielde, go dat čuvvot min eallima čađa ja mii ieža bidat daidda peršovnnalaš máidnasiid. Dahje- min oktasaš, našuvnnalaš historjjá, dajai Dronnet rahpamis.

Dronnet doalai sártni čájáhusrahpamis Dronnet Sonja DáiddaStáljas. Govven: Øivind Möller Bakken, Gonagaslaš čoakkáldagat

Čájáhusas  Šloahta giehtaduojit – duddjojuvvon 200 jagi badjel Dronnet Sonja DáiddaStáljas, oaidná čábbámus giehtadujiid mat mis oba leat ge Norggas, ja dat ovddastit hirbmat iešguđetlágan fágaid ja duddjonárbevieruid. Oktiibuot ovdanbuktá čájáhus 26 iešguđetlágan duodjefága dávviriid bokte mat bohtet Gonagaslaš čoákkáldagas. Dasa lassin lea Stuorradiggi leamaš nu árvvas ahte lea luoikan Truvdnostuolu čájáhussii, ja dat lea erenoamáš ovdamearkkan dasa maid gollehan- ja muorragohppanfága sáhttá dagahit.

Girječálli Vigdis Hjort rabai čájáhusa. Girječállima lassin, lea sus hirbmat stuora beroštupmi duddjomii ja broderemii.

Girječálli Vigdis Hjort ovdanbuvttii berošteaddji teavstta broderema ja duddjoma birra čájáhusrahpamis. Govven: Øivind Möller Bakken, Gonagaslaš čoakkáldagat

Vuohččan go čájehuvvo gehččiide

Sullii 100 dávvira leat oidnomis čájáhusas “Šloahta giehtaduojit – duddjojuvvon 200 jagi badjel” . Olu dávvirat leat vuohččan oaidninládje gehččiide. Oassin čájáhusas lea maiddái ruvdnenčikŋabivttas mii maŋemusat lei geavahusas go Dronnet Maud ruvdnejuvvui jagis 1906, ja dat lea nu go njunuš buntenduojárat ráhkadedje dan 1800-logus.

Doppe beassá maiddái oaidnit muhtun min vuosttaš guorbmevovnnain, Dronnet Sonja biktasa mii lea rievdaduvvon ja ođđasit gorrojuvvon, doppe lea Prinseassa Ingrid Alexandra Telemarkbunáda, silba-ja golleduojit, ovdanvázzi láset Hadelandas, ja dieđusge boahtá oidn0sii Ruvdnaprinseassa Mette-Marit beroštupmi gođđimii/čuoldimii ja dološmállet vintage hábmenii.

Ruvdnenbivttas geavahuvvui maŋemusat jagis 1906, ja dat lea oassin čájáhusas. Govven: Øivind Möller Bakken, Gonagaslaš čoakkáldagat

Dárbbašit eanet dás

– Mii sávvat čájáhusa lasihit ipmárdusa dasa ahte mii dárbbašit čeahpes duojáriid guoddevaš boahtteáiggi dáfus. Mii sávvat čájáhusa addit lasi gelbbolašvuođa Norgga kulturárbbi birra, ja duddjot ipmárdusa dasa ahte historjá ráhkaduvvo ja ođasmáhttojuvvo ealli giehtaduoji bokte. Dat lea min vuoiŋŋalaš ja eahpeávnnaslaš kulturárbi. Árbevirolaš giehtaduddjon eai leat dušše doložat, juoga mii lei. Muhto dat gullá maiddái boahtteáigái. Ja mun jurddašan ná: Mii dárbbašit eanet dás, dajai Dronnet su sártnis čájáhusa rahpamis.

Čájáhus ávvuda ivdneárbevieruid nu mot leat seilon buolvvas bulvii ja maid olbmot ain dollet heakkas otná dan beaivve. Govven: Øivind Möller Bakken, Gonagaslaš čoakkáldagat

Dronnegis lea alddis stuora beroštupmi giehtaduddjomii, dáidagii, kultuvrii ja kulturmuitosuodjaleapmái.

Go jagis 1954 loahpahii realáskuvlla Risas Oslos, de válddii Dronnet Sonja čuvla-ja bivttasgoarrunoahpu Oslo fidnoskuvllas. Dan maŋŋel manai son Sveitsii gos čađahii eksámena l'Ecole Professionelle de jeunes Filles skuvllas Lausannes. Doppe oahpai earret eará bivttasvieruidsárguma. Diibmá nammaduvvui Dronnet gudniduojáriin Oslo giehtaduoji-ja industriijasearvvis.

Čájáhusas beassá ge oaidnit su bargguid dan áiggis go čađahii čuvla-ja bivttasgoarrunoahpu.

Bovdejuvvon gussiid searvvis ledje oallugat geain lea duogáš giehtaduodjefágain mat leat ovddastuvvon čájáhusas. Govven: Øivind Möller Bakken,Gonagaslaš čoakkáldagat

Čájáhus Šloahta giehtaduojit – duddjojuvvon 200 jagi badjel lea Dronnet Sonja DáiddaStáljas ja lea rabas ođđajagimánu 29. beaivve rájes čakčamánu 17. beaivve rádjai.

Eanet dieđut Dronnet Sonhja DáiddaStálja rahpanáiggiid birra