Majestehta Dronnet Sonja dáiddárstipeanda

Niehku lea ollašuvvon. Nu lea Dronnet Sonja ieš čilgen Queen Sonja Print Award ásaheami. Maŋŋel go máŋgalot jagi lea dorjon dáidaga ja kultuvrra, de oaččui Dronnet vejolašvuođa ásahit sierra stipeandda gráfalaš dáidaga doarjjan.

Vuođđudus ásahuvvui jagis 2011, ja geassemánu 14. beaivve 2012 geigejuvvui the Queen Sonja Nordic Art Award vuohččan.

Queen Sonja Print Award

Juohke nuppi jagi geige vuođđudus Queen Sonja Print Award. Álggos lei dát davviriikkalaš bálkkašupmi evttohasaide viđa davviriikkain. Muhto 2014 rájes šattai dát internationála bálkkašupmin. Dát lea árvideames stuorámus bálkkašupmi mii oba gávdno ge grafihkalaš dáidaga namas.  

Dronnet Sonja geige Queen Sonja Print Award 2022 fránska-marokkanalaš dáiddárii Yto Barrada. Govven: Sven Gj. Gjeruldsen, Gonagaslaš hoavva

QSPA Inspirational Award

The QSPA Inspirational Award geigejuvvo nuorra skandinavialaš dáiddárii geasa leat čadnon vuordámušat, jat dát geigejuvvo juohke nuppi jagi.

Vuostáiváldiide fállojuvvo bargan ja orrun  gráfalaš bargobájiin ja čájáhusain, sihke ovttas eará QSPA-dáiddáriiguin ja okto.   

Jagis 2022 beasai Dronnet geiget bálkkašumi sámi dáiddárii Meerke Vekterli. Govven: Javad Parsa / NTB

Dát bálkkašupmi almmuhuvvui golggotmánu 1. beaivve 2014  the Kjell Nupen Memorial Grant muitostipeandda namas. Maŋŋel rievdaduvvui bálkkašumi namma ja šattai QSPA Inspirational Award.

QSPA Lifetime Achievement Award

Jagis 2018 introduserejuvvui QSPA Lifetime Achievement Award gudnebálkkašupmi. Dát gudnejahttá eallinagi dáiddárdoaimma, ja vuosttaš bálkkašupmi addui brihttalaš dáiddárii David Hockney su erenoamáš buori buvttu ovddas gráfihkkii.

Dronnet ovttas 2018-vuittiiguin, Emma Nishimura ja David Hockney. Govven: Nina Rangøy / NTB scanpix

QSPA Bispevika

Ođđajagimánus 2021 rahppui QSPA Bispevika - galleriija Bjørvikas Oslos. Galleriija čájeha ja vuovdá muhtun dáiddáriid grafihka ja čájeha maiddái Majestehta Dronnet Sonja bargguid. Ulbmil čájáhusbáikkiin lea ráhkadit arena gos grafihkka olaha eambbogiid.

Loga áinnas eanet QSPA neahttasiidduin 

Organiseren

Vuođđudus H.M. Dronning Sonjas kunstnerstipend ásahuvvui ođđajagimánu 14. beaivvi 2011. Vuođđudeaddjin lei Majestehta Dronnet ovttas govvadáiddariiguin Kjell Nupen, Ørnulf Opdahl ja Ole Larsen.

Loga áinnas eanet QSPA neahttasiidduin 

Vuođđudusa kapitála

2010:s álggahedje Dronnet Sonja, Kjell Nupen, Ørnulf Opdahl ja Ateljé Ole Larsen ovttasbarggu, dáiddaprošeavtta "Tre reiser – tre landskap", Golbma mátkki - golbma eanadaga. Dronnet, Kjell Nupen ja Ørnulf Opdahl ráhkadedje gráfalaš máhpaid vuovdima várás. Dáiddamáhpaid vuovdima dienas manai ollislaččat Majestehta Dronnet Sonja dáiddarstipeandda vuođđudussii, ja dat dienas lea vuođđudusa kapitála, oktan eará skeaŋkkaiguin ja attáldagaiguin.