Náitaleapmi 1968

Sivvan dasa manne soai nu guhká šattaiga vuordit, lei dat ahte Ruvdnaprinsa hálidii náitalit áibbas dábálaš nieiddain – gii ii gullan guđege gonagasvissui Eurohpás ii ge lean adel sogalaš. Diet lei ovdalaš konvenšuvnnaid rihkkun, ja dan áiggi dat dagahii garra digaštallama.

Loahpas goitge sáhtte almmuhit sudno lohpádallama:

Lohpádallan almmuhuvvo

Lohpádallan almmuhuvvui njukčamánu 19. beaivvi 1968. Dalle buvttii Stuoradiggepresideanta Bernt Ingvaldsen čuovvovaš dieđu Gonagas Olavas Stuoradiggái:

”Jeg har herved den glede å kunne meddele Dem, herr President og Norges Storting, at jeg, efter ved Statsministeren å ha søkt råd hos regjeringsmedlemmene, hos Dem herr President og de politiske gruppers parlamentariske ledere, herved gir mitt samtykke til at min kjære sønn, kronprins Harald, i dag inngår forlovelse med frøken Sonja Haraldsen, datter av avdøde Karl August Haraldsen og gjenlevende hustru Dagny, født Ulrichsen”.

Dalán go lohpádallan lei almmuhuvvon, de gesse leavgga buot almmolaš visttiide.

Vihaheapmi

Vihaheapmi lei borgemánu 29. beaivvi diibmu 17:00. Oslo lei čiŋahuvvon leavggaiguin ja liđiiguin, ollu rámbuvrriid lásiin ledje monográmmat ja govat. Lagabui 3000 soalddáha buot vearjosurggiin čužžo bálddabálddalaga dan geaidnoguoras gokko náittusbárra galggai mátkkoštit Šloahtas Duopmogirkui.

Birrasii 850 guossi ledje bovdejuvvon, ja diibmu 15:00 rájes dievvagohte olbmot Duopmogirkui. Girku lei čiŋahuvvon unnimusat 2500 liđiiguin, mat ledje ruvssut, marguerihtat, fresia, eartelieđit ja gladiolat. Go Ráđđevistedoartna diibmu časkkii 16:30, de vulggii korteša Šloahtas – ja das ledje oktiibuot 19 biilla. Njunnošiid searvvis lei Ruvdnaprinsa Harald ja su lohpádallanolmmoš, Rosenborgga grev Fleming.

Náittusmoarssi láidii Gonagas Olav girkoláhti mielde, Henry Purcells ”Trumpet tune and Air” nuohtaide. Eará musihkka mii čuojahuvvui vihaheami oktavuođas, lei Den norske studentersangforening ”Herre Gud ditt dyre navn og ære - ja Aase Nordmo Løvberg lávllui ”Alt står i Guds Faders hånd”.

Náittusbárra váccii girkus olggos J. S. Bachs Preludium Ess-dur nuohtaide, ja olggobealde ledje ollu olbmot čoahkkanan illudit ja sávvat sudnuide lihku. Akershusas bávkaledje duppal gonagassaluhta, 2 x 21 skuohta.

Heajat biste golbma beaivvi ja ledje ollu headjaguossit.

Vihačuvla

Vihačuvla lei hui álkis klassihkalaš čuvla, mas ledje 3 /4 guhkkosaš soajit, guhkes healbmi mii gessui maŋábealde, ja lei hervejuvvon vilges bearraliiguin ja gorrojuvvon hearvvaiguin. Dasa lassin lei sus stuora čalbmeluvra – ja vilges náittusmoarssi bukeahtta mas ledje vilges ruvssut, fresia, liljekonvállat ja orkidé.