Fokus: Ealáhusat ja innovašuvdna

Gonagaslaš Allavuođas Ruvdnaprinssas lea stuora beroštupmi ealáhusaide ja árvoháhkamii, ja son áŋggirda earenoamážit ovddidit gründariid ja ruoná nuppástusa. SIKT konferánsa lea boađus das go Ruvdnaprinsa hálidii viiddidit iežas ealáhusberoštumi.

Ealáhusbargguin čuovvu Ruvdnaprinsa Haakon dan barggu maid Majestehta Gonagas lea bargan ollu jagiid.

Fitnodagaid guossástallan riika siste ja olgoeatnamiin

Jagiid čađa lea Ruvdnaprinsa fitnan ollu fitnodagain ja deaivvadan jođiheddjiiguin ja bargiiguin geat barget hui iešguđetlágan doaimmaiguin miehtá riikka. 2016:s lei son guossin NHO jahkekonferánssas ja lei čoahkkimis LO riikkaorganisašuvnnain oahppan dihtii golmmaoasat ovttasbarggu birra.

Go Ruvdnaprinsa lea almmolaš mátkkiin olgoriikkain, de su fárus lea álo stuora ealáhussáttagoddi. Olgoriikadepartemeanta ja Innovasjon Norge láhčet ovttas dili nu ahte norgga ealáhusaid ovddasteaddjit galget beassat doallat čoahkkimiid vejolaš kundariiguin ja ovttasbargoguimmiiguin eará riikkain. Seammás oainnusindahká Ruvdnaprinsabárra norgga fitnodagaid ja buktagiid iežaska guossástallanmátkkiin, go fitnaba iešguđetlágan lágidemiin mátkki vuolde.

Tine buvttadanrusttet Kalbakkenis Oslos sádde jahkásaččat 100 miljovnna lihttara mielkki rámbuvrriide. Ja dasa lassin vel 30 miljovnna lihttara juice ja 30 miljovnna lihttara eará juhkosiid. Govva: Gorm Kallestad, NTB Scanpix

2013:s hálidii Ruvdnaprinsa viiddidit iežas beroštumiid norgga ealáhusaide, ja ásahii SIKT čoaggananbáikki.

SIKT – konferánsa nuorra jođiheddjiide ja taleanttaide

SIKT lea konferánsa mii dáhttu geavahit ávkin gaskal 20-40 jahkásaš nuoraid ja taleanttaid energiija ja ásahanmovtta. Ulbmil lea leahket dakkár báikin gos sáhttet ovddidit ođđa jurdagiid ja miellaguottuid haga digaštallamiid boahttevaš Norgga birra iešguđetge surggiid rastá. Jahkásaččat servet dasa lagabui 200 olbmo ealáhusain, almmolaš surggiin, akademiijas ja kultursuorggis. Lágideapmi bistá lagabui guokte beaivvi ja dan áiggis dáhpáhuvvá ollu – ja lágideapmi lea dábálaččat golggotmánus.

SIKT lágiduvvui vuosttaš geardde 2013:s, ja lea dan rájes lágiduvvon jahkásaččat – juohke jagi ođđa báikkis ja ođđa váldofáttáin:

2013: NTNU Troandimis (Boahtteáiggi Norga)
2014: Romssa Universitehtas (Innovašuvdna ja ođđafuomášumit)
2015: Bergen Universitehtas (Jođiheapmi)
2016: NTNU Ålesund (Ođđafuomášumit)
2017: Universitetet i Agder, Kristiansand (Samspill)
2018: Universitetet i Stavanger (Endring)
2019: Høgskolen i Innlandet, Lillehammer (Verdiskaping)
2020: Digital SIKT fra Skaugum (Hvordan en global pandemi påvirker oss alle)
2021: Bodø (Muligheter)

SIKT 2016 lágideapmái bovdii Ålesund guovllu Ealáhussearvi 80 nuorra jođiheaddji ja taleantta lagasguovlluin iđđesborrančoahkkimii. Govva: Christian Lagaard, Gonagaslaš hoavva

2017 SIKT lágiduvvo Agder Universitehtas Kristiansandas Ovttasdoaibman váldofáttáin. Buot gávpogiin gos SIKT lea lágiduvvon, leat dál ásahuvvon ovdalaš studeantajoavkkut (alumnijoavkkut) mat leat hui doaimmalaččat. Gávdnojit maid SIKT- fierpmádagat Stavangeris ja Oslos.

Innovašuvdna ja Ruoná nuppástuhttin

Ruvdnaprinsa Haakonis lea stuora beroštupmi čuovvut norgga gründariid, dahje start-ups, ja nuoraid geat ásahit ođđa doaimmaid. Norgga ealáhusat leat dál nuppástuvvanáiggis, ja danin lea stuora dárbu ođđa fuomášumiide ja innovašuvdnii, vai sirdašupmi ođđaáigái šaddá nu buorre go vejolaš. Ruvdnaprinsa lea áŋgirit čuvvon internašuvnnalaš konferánssaid mat leat lágiduvvon gründariidda ja innovatevrraide, Oslo Innovation Week, Slush, Shift ja Bett.

Ruvdnaprinsabárra beasai geahččalit VR-čalbmelásiid Oslo Innovation Week lágideamis 2016:s. Govva: Vidar Ruud / NTB Scanpix

Ruvdnaprinsa čájeha earenoamáš stuora beroštumi doaimmaide mat geavahit vejolašvuođaid maid Ruoná nuppástuhttin addá. Sus lea buolli beroštupmi hutkás ealáhusaide, ja fitná dávjá guossin lágidemiin mat gusket musihkkii, filmmaide ja olgoeallimii.

Ruvdnaprinsabárra by:Songs guossis- mii lea by:Larm musihkkafestivála lágideami čállinbádji. Govva: Olav Stubberud, by:Larm.

Ovttas Ruvdnaprinseassain doarju son viššalit musihkkaealáhusa ja norgga musihka vuovdaleami eará riikkaide, ovttas earet eará Music Norway.