Ráđđehusmolsun

Formálaš bealli ráđđehusa molsuma oktavuođas álgá go heaiti stáhtaministtar dieđiha Gonagassii ahte Ráđđehus áigu guođđit doaimmas, ja addá Gonagassii iezas luohpanohcamuša.

Gonagas jearrá de heaiti stáhtaministaris ráđi, ahte gean galggašii sihtat vuođđudit ođđa ráđđehusa. Gonagas sáhttá maid jearrat ráđi Stuoradiggepresideanttas dahje parlamentáralaš jođiheddjiin. Sii dábálaččat ávžžuhit nammadit stáhtaministtarevttohusa dan bellodagas dahje dain ovttasbargi bellodagain main lea eanemus doarjja Stuoradikkis. Lea vuođđolágalaš bargomálle ahte Gonagas čuovvu dien rávvaga. Dakkár dilis gos parlamentáralaš dilli lea hui eahpečielggas, sáhttá Gonagas iežas árvvoštallama mielde bargat. Ovdamearkan dasa lea dalle go Gonagas Haakon nammadii stáhtaministar Hornsrud 1928:s – ja nu vuođđudii riikka vuosttaš Bargiidbellodatráđđehusa.

Dasto Gonagas váldá oktavuođa suinna gii lea evttohuvvon, ja bivdá su vuođđudit ráđđehusa. Jus son vástida juo gažaldahkii, de bargagoahtá stahtaministtarevttohus čohkket olbmuid iežas ođđa ráđđehussii. Loahpas dieđihuvvo Gonagassii geat Ráđđehussii leat válljejuvvon.

Ovddit ráđđehusa formálalaš luohpan ja ođđa ráđđehusa formálalaš álgin, dáhpáhuvvá sierra luohpan- ja nammadanstáhtaráđis. Gonagas vuolláičállá resolušuvnna mii vuođđuda ráđđehusa, ja de leat ráđđehuslahtuid nammadeamit lágalaččat.

Mearrádusat mat gusket Gonagas Ráđi, Ráđđehusa nammadeapmái, gávdnojit Vuođđolága § 12:s:

”Kongen velger selv et råd av stemmeberettigede norske borgere. Dette råd skal bestå av en statsminister og i det minste syv andre medlemmer."