Dronnet Maud (1869-1938)

Dronnet Maud riegádii Londonis skábmamánu 26. beaivvi 1869. Son lei eŋgelas prinseassa, Gonagas Edvard VII ja Dronnet Alexandra nieida, geat maŋŋil šattaiga gonagassan ja dronnegin Stuorabrittánias. Su olles namma lei Maud Charlotte Mary Victoria.

Finadettiin fulkkiidis luhtte Dánmárkkus, de son oahpásnuvai vilbeallásis, dalá prinsa Carlii. Soai náitaleigga Buckingham Palaces Londonis suoidnemánu 22.beaivvi 1896 ja ásaiga Københámmanii. Soai oaččuiga ovtta bártni – Alexander –1903:s.

Dronnet

Dat ahte Maud lei brihttalaš prinseassa, lei mielde mearrideaddjin dasa ahte Stuoradiggi fálai Prinsa Carlii norgga truvnno 1905:s. Prinsa vuostáiválddii fálaldaga, ja brihttalaš prinseassa lei Norgga vuosttaš Dronnet maŋŋá uniuvnna loahpaheami Ruoŧain.

Gonagasbearaš bođii Norgii skábmamánu 25. beaivvi 1905, ja Dronnet Maud ruvdnejuvvui Nidarosdomenis ovttas Gonagas Haakoniin geassemánu 22. beaivvi 1906.

Dronnegin oaččui son diehttelas ollu ovddastandoaimmaid. Dieid dilálašvuođain lei son dávjá hui čábbát gárvoduvvon, ja dronnega persuvnnalaš ja hámálaš bivttasmállet leat lágiduvvon čájáhussan eatnat čájáhusain maŋit jagiid.

Vaikko vel Dronnet Maud ii lean ge nu beare oainnus almmolašvuođas, de sus ledje liikká ollu sosiála ja kultuvrralaš doaimmat. Son doaimmahii ollu veahkkebargguid jaskatvuođas, ja lei maid Dronnet Maud veahkkefoandda ásaheami duogábealde 1914:s. Foanda galggai leat veahkkin sidjiide geat máilmmisoađi geažil ledje šaddan earenoamáš váttis dillái.

Dronnet lei máŋgga dáfus priváhta olmmoš, ja sáhtii almmolaš oktavuođain leat njáigu olggosoaidnit. Priváhta lei son almmatge movttegis ja liekkus olmmoš. Son lei áŋgirit mielde Ruvdnaprinssa Olav bajásgeassimis, ja barggai dan badjelii ahte son galggai šaddat ”dáru bártnážin”, muhto ieš son gal ii goassege hupman beare bures dárogiela.

Son liikui vánddardit olggu ovddas. Son liikui sihke riidet, váccašit beatnagiiguin ja čuoigat – maŋŋá go Fridtjof Nansen dan oahpahii sutnje. Son liikui maid bures dánset, ja lei viššalis govvejeaddji.

Dronnet Maud doalai olles iežas eallináiggi nanu čanastaga Stuorabrittániai, ja son orui Englánddas vissis áiggi juohke jagi. Ja lei ge juste Dronnega – ja nu maiddái norgga gonagasbearraša – čanastat Stuorabrittániai mii galggai šaddat stuora mearkkašupmin 2. máilmmisoađi vuolde.

Hávdádeapmi

Dronnet Maud jámii skábmamánu 20. beaivvi 1938 go lei fitnamin Londonis. Son lea hávdáduvvon Gonagaslaš Mausoleumii Akershus šloahtas.