Majestehta Gonagasa adjutántabargoveahka

Adjutántabargoveagas leat ovcci adjutántta ja okta jođiheaddji:

• Jođiheaddji – Majestehta Gonagasa adjutántabargoveaga hoavda
• Majestehta Gonagasa bajitadjutánttat (golbma – okta guđege suodjalussuorggis) 
• Majestehta Gonagasa adjutánttat (golbma – okta guđege suodjalussuorggis)
• Gonagaslaš Allavuođa Ruvdnaprinssa adjutánttat (golbma – okta guđege suodjalussuorggis)

Buot Šloahta adjutánttaid lea dat dovdanmearka ahte sis lea aiguillette (bodnojuvvon golle-dahje silbaivnnát báddi) olgeš oalggi birra.

Ii leat vejolaš ohcat adjutántavirggi. Dát leat dakkár bálvalus masa olmmoš jerrojuvvo, ja rehkenasto leat oalle gudnin go jerrojuvvo álgit adjutántavirgái. Adjutánttaid válljejit sihke nissonolbmuid ja dievdduid gaskkas geat leat offiserat, ja lea Stáhtaráđđi gii gohčču sin bálvalussii. Buot adjutánttat leat golbma jagi bálvalusas. Čakčamánu 1. beaivvi juohke jagi lonuhuvvo okta offisera juohke suodjalusuorggis.

Adjutántabargoveaga doaimmat

Bajitadjutánttain bargun lea sihke seremoniijaid lágidit ja doaimmahit praktihkalaš bargguid. Sii oassálastet ja doaimmahit seremoniijaide gullevaš bargguid go ambassadevrrat buktet iežaset dovddusindahkanreivviid Majestehta Gonagassii, go stáhtaguossit bohtet Norgii ja go lágiduvvojit gállamállasat, lunsjat ja eará dilálašvuođat Šloahtas.

Praktihkalaš bargun lea jođihit prošeavttaid stuorát doaluid oktavuođas Šloahtas, nugo heajaid, máná risttašeami ja eará diekkár doaluid oktavuođas. Bajitadjutánttain eai leat fásta váktamánut Šloahtas, muhto gohččojuvvojit dohko bálvalussii dárbbu mielde.

Adjutánttain lea fásta bálvalusáigi Šloahtas juohke goalmmát mánu ja leat dat golbma adjutántta guđege golmma suodjalussuorggis geat leat bálvalusas vurrolaga. Dan guokte mánu go eai leat Šloahta bálvalusas, de sii barget iežaset fásta bargosajiin.

Adjutánttaid barggut leat:

• Plánet, oktiiheivehit, láhčit ja čuovvut Majestehta Gonagasa ja Gonagaslaš Allavuođa Ruvdnaprinssa almmolaš prográmmaid
• Plánet, ráhkkanahttit ja čuovvut mielde guossástallamiid čađahemiin riikka siste ja olgoriikkain, dasa gullá maid dat bargu ahte gulahallat gussiid vuostáiváldi dálusidiin ja roavváin, fylkamánniiguin ja doaimmahit eará bargguid maŋŋá guossástallama
• Plánet ja ráhkkanahttet audienssaid, vuostáiváldimiid ja čoahkkimiid 
• Bearráigeahččat ahte Majestehta Gonagasas ja Gonagaslaš

Allavuođas Ruvdnaprinssas leat doarvái duogášdieđut ja leahket veahkkin praktihkalaš ráhkkanemiin almmolaš guossástallamiid oktavuođas.

Organiseren

Buohkat adjutántabargoveagas leat fásta virggiin Suodjalusas. Suodjalus gokčá sin bálkká ja mátkegoluid, muhto Gonagaslaš hoavva lágida kántursaji ja gokčá dasa guoskivaš goluid. Adjutántabargoveahka lea organiserejuvvon sierra ossodahkan Gonagaslaš hoavas ja ossodathoavda lea Hoavvahoavdda jođihanjoavkkus mielde. Adjutántabargoveaga hoavda raportere njuolga Hoavvahovdii beaivválaš bargguin ja buot gažaldagaid mat gusket Šlohttii, ja oažžu bargguid ja gohččumiid doppe. Áššiid mat gusket Suodjalussii, raportere son njuolga Suodjalushovdii.

Brigader Steffen Masserud lea adjutántabargoveaga hoavda.