Sogn ja Fjordane 2006

Ruvdnaprinsabára prográmma sisdoallu lei earet eará:

Askvoll čakčamánu 5. beaivvi

Ruvdnaprinsabárra bođii Bulandet báikái diibmu 11.00 ja lei mielde doaluin Bulandet kapeallas. Go Leigga kapealla geahčadan, de jotkkiiga mátkki viidáseappot Nikøykájai gos beasaiga gullat báikkálaš guolleealáhusa ja Landøy geađgenindustriija birra.

Flora čakčamánu 5. beaivvi

Ruvdnaprinsabárra joavddai Kvalstad ruggui, Svanøyas diibmu 13.30. Dáppe soai finaiga Norsk hjortesenteris, gos sudnuide muitaluvvui dien guovddáža birra ja movt doppe váldet vára sarvváin. Prográmmas ledje dasto ollu kulturovdanbuktimat Florø olgogávpebáikkis.

Ruvdnaprinsa ja Ruvdnaprinseassa beasaiga dasto gullat movt Solbakken dorvoohcciid vuostáiváldinviesus barget báhtareddjiiguin ja movt ožžot sin searvat Flora servodahkii. Ruvdnaprinsabárra finai vuostáiváldinviesus ja deaivvadii muhtun viesu ássiiguin doppe.

Beaivi loahpahuvvui feastaeahkediin Flora servodatviesus, gos guovddážis lei Flora nugo riikkaidgaskasaš suohkan.

Gloppen čakčamánu 6. beaivvi

Ruvdnaprinsabárra bođii Sandanii diibmu 11.30. Maŋŋá vuostáiváldima kájas, de lei álbmotfeasta Heradsplassenis. Gloppen kulturskuvlla oahppit ja Firda joatkkaskuvlla oahppit guoimmuhedje.

Ruvdnaprinsa ja Ruvdnaprinseassa finaiga dan maŋŋil Grøn omsorgas Kvias Breimas. Grøn omsorg lea doaibma-ja astoáiggefálaldat nuoraide man vuođđun leat eanandoallofálaldagat. Fálaldat lea nuoraide geat leat doppe beaiveáiggi dahje vahkkoloahpaid.

Stryn čakčamánu 6. beaivvi

Ruvdnaprinsabárra mátkkoštii viidáseappot Innvikai, gos sudnuide čájehedje Innvik Sellgren fabrihkkalanjaid. Doppe beasaiga oaidnit movt čuoldinmašiinna geavahit, ja sudno guossástallama oktavuođas čulde Ruvdnaprinsabárrii sudno monográmma. Dan maŋŋá muitaluvvui sudnuide ollislaččat Stryn suohkana viiddis designbirrasa birra.

Álbmotfeasta Per Bolstad báikkis loahpahii dán beaivvi almmolaš prográmma.

Hornindal čakčamánu 7. beaivvi

Ruvdnaprinsabárra álggahii beaivvi Hornindal mánáigárddi guossástallamiin gos maid beasaiga gullat makkár dáiddaprošeavttaiguin mánát barge. Mánáin lea sin iežaset vuoššangirji ja sii guossohedje neslemáli ja soahkelastasáfta Ruvdnaprinsii ja Ruvdnaprinsessii.

Mánát ledje maid mielde lágideamen biepmu álbmotfestii Grodås márkanguovddážis.

Diehtojuohkin suohkanviesus loahpahii guossástallama Hornindalas, gos earet eará čájehuvvo Svor musea skulptuvrrat.

Eid čakčamánu 7. beaivvi

Ruvdnaprinsabárra bođii Nordfjordeidii diibmu 13.40. Guossástallan álggii váccašemiin Eidsgáhta mielde, ja dan mátkkis ledje ollu kulturovdanbuktimat. Dan maŋŋil muitaledje Ruvdnaprinsabárrii Nordfjord psykiatriguovddáža psykiatri- ja gárrenmirkodivššu birra.

Guossástallan loahpahuvvui álbmotfeasttain Eksersisplassenis.