Ruvdnenávvudeapmi 2006

Dan oktavuođas go lea gollan 100 jagi dan rájes Gonagas Haakon ja Dronnet Maud ruvdnejuvvuiga 1906:s, de lágidii Gonagasbearaš fylkamátkki Eidsvollas Troandimii, sii mátkkoštedje sihke Gonagasvovnnain ja Gonagasskiippain.

Eidsvoll - Åndalsnes

Gonagas, Dronnet ja Ruvdnaprinsabárra bohte fárrolaga Eidsvollii. Eidsvollas sávve mánát ja nuorat gonagasgussiide buresboahtima Riikasálas – gos lei lávlun ja teakstalohkan. Dan maŋŋá lei feastaprográmma Eidsvoll historjjá birra.

Sii mátkkoštedje viidáseappot gonagasvovnnain Hamarii. Doppe besse gonagasguossit vánddardit heastafievrruin Skibladnerbruggii, gos lei feastaprográmma gos besse gullat Hamara historjjá ja vikiŋggaid áiggi birra. Gonagaslaš guossit manne dasto togain Ottai, gos lei feastaprográmma párkkas. Musihkka- ja teáhterjoavkkut ovdanbukte. Earet eará čájehedje sii oasi Kristin Lavransdatter čájáhusas. Ja dan maŋŋá sii vulge togain viidáseappot Åndalsnessii gos maid lei feastaprográmma.

Kristiansund - Troandin

K/S Norge joavddai Kristiansundii. Majestehta Gonagas rabai Storkaia ja Arnulf Øverland gáhta, go rabai ovtta plakeahta. Dan maŋŋá lei feastaprográmma, gos earet eará lei mánáidkoarra ja dánsenjoavku. Ja de manne Gonagasbárra ja Ruvdnaprinsabárra fas KS Norge skiipii, ja jovde eahkes Austrått kajai Ørlandda suohkanis. Gonagasbearaš váccii bajás Austråttborgenii gos sidjiide ledje lágidan čájeheami ja feastaprográmma; Austråttspelet.

K/S Norge joavddai Troandimii iđđesbeaivvi, geassemánu 21. beaivvi, ja Gonagasbárra ja Ruvdnaprinsabárra besse fárrudit Stiftsgårdenii.

Feastaipmilbálvalus Nidarosdomenis

Gonagasbárra ja Ruvdnaprinsabárra vácce Stiftsgårdenis Nidarosdomenii. Doppe lei feastaipmilbálvalus maid bisma Finn Wagle jođihii, ja maŋŋil lei rahpanseremoniija Vestfrontbygget guossástallanguovddážis. Ladnegárdimis beasai Gonagasbearaš oaidnit Regaliáid- ja Ávvučájáhusa, ja doppe maiddái muitaluvvui daid birra.

Beaivi loahpahuvvui Ávvumállásiiguin Stiftsgårdenis.

Mihcamáreahket

Mihcamárbeaivvi finai Ruvdnaprinsabárra Huseby skuvllas. Ja dan maŋŋá lei olles Gonagasbearaš gávpebáikkis, gos lágiduvvui Feastakonsearta mánáide ja nuoraide. Olles Gonagasbearaš vulggii Stiftsgårdenis Sverresborgii Mihcamáreahket doaluide. Eahkes lei ávvu- ja feastakonsearta Nidarosdomenis.