Gonagas Haralda ja Dronnet Sonja sivdnádallan

Goappešagat, sihke Gonagas Harald ja Dronnet Sonja hálideigga sivdnádallojuvvot iežaska doibmii sivdnádallanseremoniijain Nidarosdomenis.

Sivdnádallanmátki

Sivdnádallama oktavuođas čađahii Gonagasbárra logibeaivásaš mátki Lulli-Norggas. Ruovttoluotta Osloi soai mátkkošteigga Gonagaskiippain Norge. Jagi maŋŋil mátkkošteigga soai 22 beaivvi njealji davimus fylkkain.

Dat vierru ahte čađahit guhkes mátki stuora ossiin riikkas sivdnádallama oktavuođas, lea vierru mii manná maŋos gitta gaskaáiggi gonagasaide, geat dikte iežaset máidnojuvvot iešguđetguovlluid diggebáikkiin riikkas.

Ovdal sivdnádallama, de ledje ruvdnenregáliaid fievrredan Norges Bank lanjain Troandimis Nidarosdomenii. Serenomiija vuolde ledje gonagasa ja dronnega ruvnna bidjan goabbat beallái allaáltara.

Seremoniija

Nidarosdomenis vuostáiválddii Nidaros bisma, Finn Wagle ja Oslo bisma Andreas Aarflot Gonagasbára. Bisma Wagle dearvvahii Gonagasa dáid sániiguin: ”Ipmil várjalehkos du sisaboahtima ja du olggosmannama dán bottu rájes agálaš áigái”.

Dasto váccii olmmošráidu girku sisa, ja Gonagas ja Dronnet čohkkedeigga 1818 ruvdnenstuoluide. Maŋŋel sártni ja čálalohkama, logai bisma sivdnádallanrohkosa ja Gonagas Harald loaiddastii ovdan.

Gonagas čippustii allaáltárii. Bisma Wagle bijai gieđas Gonagasa oaivvi ala ja rohkadalai:

”Buotveagalaš Ipmil, don leat leamaš min ássanbáikin sogas sohkii, ja du riika ii earáhuva goassege. Don leat Hearrá ja du ovdii fertii juohke čibbi sojaldahttojuvvot. Mii rohkadallat, geahča árpmuinat su beallái gii čippustallá dás du muođuid ovddas.

Sivdnit Gonagas Harald V, nanne ja láide su su doaimmain nugo Norgga Gonagas. Divtte bálvalusaid maid son bargá álbmoga ja girku ovddas šaddat buressivdnádussan. Divtte min Gonagasa beassat eallit ovttas iežas álbmogiin friddjavuođas ja ráfis, du árbmugas gieđas.

Mii rohkadallat du, divttášit Gonagas Haralda hálddašit su alla gohččuma viisodagain ja vuoiggalaš mielain, ja ovddidit duohtavuođa ja rievtti du dáhtu ja álbmoga lágaid mielde. Bajásdoalau su iežat árkkalmastinvuođainat jus lossa beaivvit bohtet, ja leage don ieš su fápmun ja illun. Dan rohkadallat mii Jesusa nammii.”

Dasto loaiddastii Dronnet ovdan ja čippustii Gonagasa báldii. Gieđain Dronnega oaivvi alde rohkadalai bisma dán rohkosa:

”Buot iluid Ipmil, jorgal árpmut Dronnet Sonja beallái. Divtte su doaimma leat doarjjan Gonagasa daguide. Veahket su geavahit návccaidis ja fámuidis ávkin Norgga riikii ja olbmuide. Divtte buressivdnádusat ja ráfát deavdit su miela. Doala Dronnega badjin gievrras gieđainat, vai son álo gávdná doaivaga ja fámu du siste. Dan rohkadallat mii Jesusa nammii.”

Dasto logai bisma rohkosa sihke Gonagassii ja Dronnegii. Ja de son čippustii áltárii dan botta gonagaslávlla lávlojuvvui. Ja de čuoččahii bisma ja jorggihii Gonagasbára guvlui, geat ain leigga čippostallamin allaáltára ovddas. Son logai buressivdnádusa sudnuide:

”Min Hearrámet Jesus Kristus árbmu, Ipmila ráhkisvuohta ja Bassi Vuoiŋŋa servvolašvuohta lehkos dudno mielde. Amen.”

Hoavvahoavda loaiddastii ovdan ja láidii Gonagasa ja Dronnega fas ruvdnenstuoluide.