Slottsarkitekturen

Slottet vart bygd under kongane Carl Johan og Oscar I med danske Hans Ditlev Franciscus Linstow som arkitekt. Han hadde juridisk embetseksamen, men hadde også studert bygningskunst ved akademiet i København. I 1812 kom Linstow til Noreg, og da unionen mellom Noreg og Danmark vart oppløyst i 1814, bestemte han seg for å bli.

Dei første utkasta til teikningar av Det kongelege slott var alle baserte på eit stort H-forma anlegg med søyleboren tempelfront. Av økonomiske grunnar vart anlegget redusert.

Fasaden på Slottet slik Linstow så den for seg (Foto: Helge Hovland, Det kongelege hoffet)

Innreiinga

Innreiingsarbeida tok til i 1838, og i denne fasen var arkitektane Heinrich Ernst Schirmer og Johan Henrik Nebelong assistentar for Linstow. Innreiinga speglar mangfaldet i stilutviklinga fram mot midten av 1800-talet. Ein av dei leiande dekorasjonsmålarane på den tida, Peter Fredrik Wergmann, var ansvarleg for dei pompeianske dekorasjonane i Den daglige spisesal og Den store spisesal, mens målaren Johannes Flintoe utførte dekorasjonane i Fuglerommet.

Gjennom åra har det vore gjennomført fleire moderniseringar og utbetringar av Det kongelege slottet. Dei fleste ombyggingane har skjedd i samband med tronskifte.

"Alterdecoration til Slotscapellet i Christiania" tegnet av Linstow i 1837. Foto: Helge Hovland, Det kongelege hoffet.

Arkitektar og handverkarar

Fleire arkitektar og handverksmeistre var knytt til byggingen:

Slottsarkitekten: Hans Ditlev Franciscus Linstow (1787-1851)

• Christian H. Grosch (Linstow sin  assistent til 1827)
• Ole Peder Riis Høegh (Linstow sin assistent til 1827)
• Heinrich Ernst Schirmer (Linstow sin assistent 1838-1841)
• Johan H. Nebelong (Linstow sin assistent 1840-1848)

• Carl Abrahamsen, snikkarmeister
• Andreas Benthien, tømrarmeister
• Hans Johansen Borge, snikkarmeister
• Johan Henrik Bøhm, snikkarmeister
• Pietro Natale Guidotti d.e., gips- og stukkmakar
• Daniel Koch, snikkarmeister
• Chr. H. Malling, tømrarmeister
• Georg Marcus Nordraach, malarmeister
• Sebastian Pfützenreuter, murmeister
• Jens Conrad Seidelin, murmeister
• Peter Christian Frederik Wergmann, malarmeister
• Jacob Emilius Wunderlich, malarmeister
• August Carl Wilhelm Thomsen, elev ved Kunstakademiet i København