Gonagaslaš hoavva ovdanbuktá 2023 jahkeraportta

Maiddái jagis 2023 deaivvadii Gonagasbearaš olbmuiguin miehtá Norgga; skuvllain, easkaálggahuvvon fitnodagain ja árbevirolaš industriijafitnodagain, dávvirvuorkkáin ja girkuin, vuođđoealáhusain, festiválain ja spealuin, dutkanásahusain, organisašuvnnain, valástallandoaluin ja maiddái oallugiiguin geat gillájedje bahuid «Hans»-nammasaš dálkkiid geažil borgemánus.

Sihkkarvuođadilli Eurohpas lea muđui čuohcan diimmážii. Gonagas ja Ruvdnaprinsa leaba cađahan olu galledemiid ja doaimmaid ovttas Norgga suodjalusain. Dasa lassin muittuhii USS Gerald galledeapmi miessemánus ja Presideantta  Volodymyr Zelenskyj galledeapmi Šloahtas juovlamánus, dan duođalaš dili máilmmis. Ja dát maiddái muittuha man dehálaš buorre lihtolaš ovttasbargu lea. Olggobeal min riikkarájiid lea Gonagasbearaš ovddastan Norgga sihke Danmárkkus, Stuorra-Británnias, Ránskas, Ruoŧas ja Duiskas. Dáid galledemiid bajilčállagat leat leamaš ruoná molsun, suodjalus-ja ealáhusovdánahttin ja kulturovttasbargu.

Gonagaslaš doaimmat leat maiddái diibmá ivdnejuvvon olahusain bearraša historjjás. Ruvdnaprinsabárra lea ávvudan 50-jagi beivviid. Ruvdnaprinsabárra háliidii dán geavahit liiban ávvudit Norgga ja min searvevuođa. Soai loktiiba ovdan olles viiddis riikka ja olbmuid geat lea mielde hukseme min Norgga. Dán dagaiga soai earret eará mátkkiid bokte iešguđetge osiide Norggas, ja loahpas bovdiiga stuora olgofestii Šloahta duogábeal-šiljus gosa leigga bovden 370 guossi miehtá Norgga.

Jahkerehketdoallu

Gonagaslaš civilliste jahkerehktedoallu čájeha rehketdoallobohtosa mas lea plánejuvvon 54,3 miljovnna ruvdnosaš vuolláibáhca buohtastahttojuvvon jagi juolludemiin. Dán gokčet ovdalaš juolludeamit. Boađus čuovvu dasto daid vuordámušaid mat ovdalaččas bohte ovdan 2022 jahkeraporttas.

Sivvan vuolláibáhcagii lea ahte juolludeamit sihkkarvuođaprošektii eai ollásii čuovo olggosmáksimiid. 2023:s lea dán prošeavttas rehketdoalu hárrái 70,9 miljovnna vuolláibázan (buohtastahttojuvvon vásttolaš badjebáhcagiin jagis 2022 mii lei 92,7 miljovnna ruvnno).  Sihkkarvuođaprošeakta lea leamaš jođus 2016 rájes, ja loahpahuvvui buori muddui jagis 2023. Perimehtersihkkarastin Šloahta ja Šloahtagárdima birra giddejuvvui ja Logistihkkavisti, mii sihkkarastá oadjebas poasta, gálvo-ja doappargieđahallama, rahppui.  Leat ain báhcán smávit barggut mat dál leat loahpahuvvome.

Gonagaslaš Hoava doaibmarehketdoallu čájeha 16,5 miljovdnasaš badjebáhcaga. Váldosivvan doaibmabadjebáhcagii lea ahte sihke ođđasitvirgáibidjamat ja prošeavttat leat maŋiduvvon dan botta go organisašuvdna-ovdánáhttinprošeakta čađahuvvo. Rehketdoallu čájeha ahte mearkkašahtti stuora oassi dábálaš juolludeamis geavahuvvo Šloahta doaibmadollui, Šloahta ja gonagaslaš opmodaga bajásdoallamii lassin kultuvrralaš ja historjjálaš dávviriid fuolaheapmái.

Gonaslaš Hoava jahkeraporta oktan jahkemuitalusain 2023 ovddas, lea geigejuvvon Stuorradikki presideantagoddái, Digitaliseren- ja hálddašandepartementii ja Riikarevišuvdii.