Almmolaš guossástallan Mosambikas

Olgoriikaministtar Dag-Inge Ulstein lea Ruvdnaprinssa fárus mátkkis. Fárus leat maid norgga ealáhusaid ovddasteaddjit, geat čájehit dađistaga stuorát beroštumi  Nuorta- Afrikai.

Norggas ja Mosambikas leat guhkes mearragáttit ja danin goappešat riikkain lea stuora beroštupmi  doalahit buhtis ja nanu guoddevaš  ábi. Mosambik lea dasa lassin okta dain riikkain mii lea rašimus gierdat dálkkádatnuppástuvvamiid váikkuhusaid. Doppe vásihit dávjjibut issoras garra dálkkiid, ja 2019:s dagahedje syklonat Idai ja Kenneth issoras stuora billistemiid.

Áhpi ja biras

Ábi nuoskkideapmi lei guovddážis go Ruvdnaprinsa Haakon finai Costa do Sol mánáidskuvllas olggobealde Maputo eske beaivet. Skuvla lea Praia dos Pescadores áhpegátti lahka ja lea mielde prošeavttas maid Norga lea dorjon, mas galget giddet fuomášumi nanu guoddevaš ábiide ja mariidna nuoskkideami dutkamiidda. Ulbmilin lea  oažžut eanet diđolašvuođa birrasii skuvllain ja oahpahusas, ja dasa ahte čorget báikkálaš birrasiid.

Mánát Costa do Sol skuvllas olggobealde Maputo čájehit Ruvdnaprinsii ja Dag-Inge Ulsteinii maid sii leat ráhkadan plastihkain maid fiervvás leat gávdnan. Govva: Sven Gj. Gjeruldsen, Gonagaslaš hoavva

Lagabui 13 miljovnna tonna plastihkka bálkestuvvo áhpái jahkásaččat. Dat ahte mánát dál bajásšattadettiin ohppet gidde diđolašvuođa birrasii ja áŋgirit servet čorgendoaimmaide, addá doaivaga ja jáhku dasa ahte mii nagodit čađahit dárbbašlaš nuppástusaid.

Fiervvás beasai Ruvdnaprinsa gullat eambbo dan birra mot dálkkádatnuppástuvvamat váikkuhit Mosambikii. Syklonat, goikkádagat ja dulvvit  čuhcet garrasit. Mosambik lea geafes riika gos eanas oassi olbmuin ellet eanadoaluin. Luondduroasut billistit šattuid ja siskkáldas struktuvrraid, ja dagahit ollugiid  báhtareaddjin iežaset riikkas.

Fiervvás muitalii CEAR jođiheaddji, Carlos Serra, eambbo dan birra mot dálkkádagaid nuppástuvvamat váikkuhit Mosambikii. Govva: Sven Gj. Gjeruldsen, Gonagaslaš hoavva.

Dát rašes dilli ja doaimmat mot nannet Mosambika gierdat dálkkádagaid nuppástuvvamiid, lei maid fáddán lunššas mii lágiduvvui norgga resideanssas Maputos.

Deaivvadeapmi Presideanttain

Go Ruvdnaprinsa Haakon vulggii skuvllas, de son manai čoahkkimii Eksellense Presideanttain Filipe Jacinto Nyusi. Álgoságastallamiid maŋŋil čuovuiga soai ođđa šiehtadallama vuolláičállima Oljosuorggi ovddidanprográmmas.

Mosambikas leat stuora luondduriggodagat ja lea huksegoahtán stuorát golgi gássa rusttegiid. Dat gássagávdnosat sáhttet dahkat Mosambik stuora energiija lágideaddjin máilmmimárkaniin, ja sáhttá leat čoavdda dasa mot olahit buresbirgendili riikkas.

Ruvdnaprinsa Haakon ja Presideanta Filipe Nyusi deaivvadeigga ságastallamiidda. Govva: Sven Gj. Gjeruldsen, Gonagaslaš hoavva

Norga lea dorjon Mosambika teknologalaš čovdosiiguin petroleumsuorggis badjel 30 jagi. Šiehtadus mii odne vuolláičállojuvvui, fievrreda ovttasbarggu viidáseappot. Das deattuhuvvo dakkár resursahálddašeapmi man boađus lea ahte riggodagat bohtet olles servodahkii buorrin. Norgga modealla sáhttá adnot ávkkálaš gelbbolašvuohtan dán suorggis.

Rašes joavkkuid searvadahttin

Guovvamánu 12. beaivvis  14. beaivái čalmmustahttojuvvui stuora ovttasbargoprošeakta mas leat fárus guhtta Mosambik ja njeallje Norgga organisašuvnna. Prošeavtta namma lea "Searvadahttin ovttas, Mosambik" ja Ruvdnaprinsa Haakon lei mielde rahpamis odne. Prošeavttas barget doaibmahehttejuvvon olbmuid vuoigatvuođaiguin ja sisttisdoallá dehálaš fáttáid nugo organiseren, oahppu ja ekonomalaččat ieš birgen.

Ruvdnaprinsas Haakon finai maid TV-kanála TV-Surdo guossis. TV-Surdo ráhkada prográmmaid mat ovddidit doaibmahehttejuvvon rivttiid ja fáttáid nugo dearvvašvuohta, borramušat ja HIV. Kanála lea okta golmma organisašuvnnas mat ožžot doarjaga Norggas, mat ovttasbarget journalisttaid oahpahemiin ja ovddidit journalistihka man vuođđun lea rašes joavkkuid searvadahttin.

Ruvdnaprinsa ja Dag-Inge Ulstein ovttas olles TV-Surdos doaimmahusain. Govva: Sven Gj. Gjeruldsen, Gonagaslaš hoavva

Prográmmaid doaimmaheaddjit muitaledje Ruvdnaprinsii makkár hástalusat doaibmahehttejuvvon olbmuin leat otná Mosambikas , ja Ruvdnaprinsa Haakon báddii videodearvuođaid TV-Surdoi.

Almmolaš mállásat

Eahkes lea Ruvdnaprinsa Haakon Presideantta Nyusis guossin almmolaš mállásiin Presideantagárdimis.

Ihttá prográmma sisttisdoallá ollu doaimmaid nugo ealáhusovttasbarggu, seminára dan birra makkár mearkkašupmi nissonolbmuin lea ráfibargguin ja fealtaguossástallan mii čalmmustahttá energiija.