Rabai 159. Stuoradikki

Seremoniija lágideapmi lea leamaš Vuođđolága § 74 :s juo 1814 rájes ja lea 200 jagi gollan dan rájes Stuoradiggi čoahkkanii vuosttaš geardde. Jahkásaš Stuoradiggi ásahuvvui easka 1871:s - ja danin lea dán jagi Stuoradikki rahpan 159. rahpan, ii ge nummar 200.

Majestehta Gonagas bođii Stuoradiggái ovdalaš diibmu 13.00, oktan Majestehta Dronnegiin ja Gonagaslaš Allavuođain Ruvdnaprinssain. Dábálaččat lea dát dilálašvuohta áidna geardi olles jagis go Gonagas lea Stuoradikkis, ja lea áidna dilálašvuohta goas sihke Gonagas ja Ráđđehus, Stuoradiggi ja Alimusriekti leat čoahkis ovtta báikkis.

Truvdnasárdni ja Riikka dilálašvuohta

Seremoniijas leat guokte váldoelemeantta: Truvdnosárdni ja Čilgehus riikka dilálašvuođa birra. Gonagas lohká Truvdnosártni, muhto dan leat čállán Ráđđehusa áirasat. Sártnis biddjojuvvojit ovdan Ráđđehusa politihka váldolinját boahtte jáhkái. Dasto moatti beaivvi geahčen lea truvdnosárdnedigaštallan. Dat lea ságastallan gos Ráđđehus ja opposišuvdna digaštallet dehálaš osiid truvdnosártnis.

Truvdnosártni maŋŋá lea čilgehus riikka dilálašvuođa birra. Dan oasis geahčadit maid Ráđđehus lea nagodan ollašuhttit maŋemus jagi, ja árbevierrun lea ahte lea Ráđđehusa nuoramus lahttu guhte dan sártni galgá lohkat. Dán jagi lei máhttoministtar Torbjørn Røe Isaksen gii logai čilgehusa.

Go čilgehus lea lohkkojuvvon, de addá stáhtaministtar dan Gonagassii, guhte de addá sihke Truvdnosártni ja Čilgehusa riikka dilálašvuođa birra Stuoradiggepresidentii. Stuoradiggepresideantaámmát lea alimus almmolaš ámmát Norggas Gonagasa vuolábealde.

Vuođđolágas mearriduvvon seremoniija

Stuoradikki rahpanseremoniija lea nannejuvvon Vuođđolága 74. paragráfas:

"Så snart Stortinget har konstituert seg, åpner kongen eller den han beskikker, dets forhandlinger med en tale der han underretter det om rikets tilstand og de forhold som han især ønsker å lede Stortingets oppmerksomhet mot. Ingen deliberasjon må finne sted i kongens nærvær."