Trööhnege Röörosne

Daate joekoen sjïere gærhkoe Röörosne lij gaervies jaepien 1784 Jupmelen Earose, jallh guktie gærhkosne tjåådtje Til Guds Ære og Bergstaden Ziir. Kåahperevierhkie bigkemem meeksi, jïh dam maahta aaj gærhkoen sisnie vuejnedh: Vierhkien væhta lea gaajhkine njieljie bieline dennie veelkeskaalhkeme gærhkoetåarnesne, jïh gærhkoetjiehtjielisnie maahta bïerjekåårpsen faanah jïh guvvieh vuejnedh dovne destie mij maalmem gaavni jïh vierhkien direktöörijste.

Gærhkoe lea Nöörjen vïjhtede stööremes – jïh bigkesovvi juktie gaajhkesidie tjeekedh mah lin bïerjevearhkan ektiedamme dan aejkien gosse gærhkoe tseegkesovvi. Dej gaskem mah leah juvlelgamme dennie båeries gærhkoegaertienisnie lea Bergstaden stoerre tjaelije Johan Falkberget.

Jaepien 2008 akte stoerre dåvvomebarkoe eelki. Gærhkoem orresistie rïhpesti feestegyrhkesjimmine goeven 12.b. 2011, jïh daan biejjien Trööhnege Sonja bïevnesh åadtjoeji dan stoerre barkoen bïjre mij dorjesovvi. Aaj nuepie sjïdti naaken dejstie musihkerijstie goltelidh mah Vinterfestspillese haarjanin.

Vaanterdimmie vearteneaerpesne

Bergstaden lea UNESCO:n vearteneaerpielæstosne tjaalasovveme. Trööhnege aktem onne vaatovem åadtjoeji gosse gærhkoen luvhtie veedtsi Nöörjen Kultuvremojhtesefoenten gåajkoe Bergmanns-gaatesne, mearan Einar Aasen soptsesti dej haestemi bïjre mejtie åtna gosse  vearteneaerpien gaskoeh årroeminie.

Gosse lin Kultuvremojhtesefoenten gåajkoe båateme, dellie Trööhnege Sonja bïevnesh barkoen bïjre åadtjoeji, gusnie leavloe bïejesovvi dåvvomebarkose Röörosen bïerjestaaresne. Jalhts uvtemes Röörosen bïjre soptsestin daan biejjien, Kultuvremojhtesefoente barka gorredimmine jïh bievnieminie vaarjelimmievyörtegs jïh vaarjelamme kultuvremojhtesijstie abpe laantesne.

Mænngan desnie orreme dle dïhte vaanterdimmie jåarhki bergstaden histovrijen tjïrrh.

Gaavnesjimmie åarjelsaemien kultuvrine

Vaanterdimmie Malmplassesne orriji, jïh daesnie akte gierehtseråantjoe Trööhnegem vuertieji. Dueljine jïh råavkine juktie bïjvedh, dle Rööroste vuejiejin Praahken vööste, gusnie Rørosrein höölteste. Aajhtere, Eva Nordfjell, jïh maanah dehtie åarjelsaemien maanagierteste Trööhnege Sonjam dåastoejin gosse bööti. Maanah dovne laavlomem jïh blommah meatan utnin Trööhnegasse.

Rørosrein dovne bovtsigujmie, smeejveminie jïh bearkoebarkojne gïehtele, jïh jïjtsh beapmoedorjesh jïh darjomh duaka. Daesnie maahta bovtsigujmie vuejedh, voejhkelidh åådtjedidh jïh vielie dan åarjelsaemien kultuvren bïjre lïeredh. Håalemh jïh jeatjah darjomh leah gåetien sisnie, jïh diekie Trööhnege Sonjam dåeriedi.

Trööhnege voenges maalestahkem åadtjoeji, jïh håalemh jïh soptsestimmieh lin maalestahken bealese. Eva Nordfjell båatsoen bïjre soptsesti, jïh tjïelten åejvie Hans Vintervold soptsesti guktie tjïelte barkeminie juktie Röörosem saemien reeremetjïeltine tseegkedh. Toini Bergstrøm haestemi bïjre soptsesti åarjelsaemien gïelebarkojne dajvesne. Åarjelsaemien gïelelïerehtimmie jïh nyjsenæjjaj nuepieh jïh haestemh lin vihkeles aamhtesh buertiej bïjre.

Guhkiebasse Hamaren gåajkoe

Daan iehkedsbiejjien Trööhnege guhkiebasse Hamaren gåajkoe vualka. Daan iehkeden rïhpestimmie Hamaren orre kultuvregåeteste, jïh Trööhnege sæjhta stïeresne årrodh rïhpestimmie-showesne.