Fra Berliner til Buick

Dalle 1905:s go Gonagas Haakon ja Dronnet Maud fárriiga Šlohttii Norgga ođđa gonagasbárran, de eai lean báhcán vovnnat eai ge heasttat dohko maŋŋá uniuvnna bieđganeami. Guoros stáljaid fertejedje fas deavdigoahtit. Fertejedje maid skáhppot fievrruid sihke gálla, almmolaš ja priváhta oktavuođaie. Dain fievrruin leat dál ain vuorkkás 19 vovnna ja 7 gearru – ja dat lea Norgga oktavuođas oalle earenoamáš vuorká. Ollu dain vovnnain leat ge dál biddjojuvvon Dora Kulturbunkerii čájáhussan.

Máŋga Šloahta boarráseamos biillain leat maid oassin čájáhusas, ja dat čáppa 1906 ruvdnenvovdna lea maid guovddážis – dan lea ráhkadan O. Sørensen vovdnafabrihkka Kristianias, ja das oaidná Norgga čeahpimus giehtaduoji mas lea buoremus kvalitehta. Unna reagaš maid Ruvdnaprinsa Olav oaččui golmmajagi riegádanbeai skeaŋkan Troandin skuvlamánáin, čájehuvvo dál vuosttaš geardde

Áiga juo leamaš el-biila

Biillaid searvvis maid Gonagasbárra beasai geahčadit, lei maid Ruvdnaprinsa Olav stoahkanbiila maid son oaččui 1912:s. Dan son oaččui áhkustis, Dronnet Alexandras ja dat lea Cadillac Roadster 1:3 modealla. Dat stoahkanbiila lea okta golmma biillas mat ráhkaduvvo dalle čájehan dihtii máilmmi vuosttaš biillaid maid sáhtii elektruvnnalaččat oažžut vuolgit, mat čájehuvvojedje máilmmičájáhusas Londonis seamma jagi. Cadillacain sáhtii vuodjit 15 eŋgelas miilla ovdal go fertii láddet batteriijaid fas.

Mátkkis

Seammaládje go dál ge, de lei dalle maid mátkkošteapmi miehtá Norgga hui dehálaš Gonagasbearrašii. Čájáhus čuovvu Gonagas Haakona, Dronnet Maud ja Ruvdnaprinsa Olav vuosttaš guhkes mátkkis maid sii čađahedje dán riikkas: Ruvdnenmátki 1906 geasi. Sii mátkkoštedje Gudbrandsdalena mielde togain, badjel Dovreduoddara ja vulos fas Romsdalenii heasttain ja vovnnain, ja Åndalsnesas fas mearragátti Troandimii Gonagasskiippain Norge. Dronnet Maud lei čeahppi ja viššal govvet, ja Dronnega govat láidestit historjjá.

Kulturministtar Hadia Tajik rabai čájáhusa. Dasto čuovuiga ja čájeheigga hálddahusdirektevra Suzette Paasche ja Sissel Guttormsen, guhte lea jođihan prošeavtta, čájáhusa Gonagassii ja Dronnegii.

Hálidii oaidnit A1

Go Gonagas beasai oaidnit A1, de gal illosii earenoamážit. Maŋŋel čájáhusa muitalii Gonagas earenoamážit dien buick birra, maid Ruvdnaprinsa Olav ja Ruvdnaprinseassa Märtha oaččuiga skeaŋkan go leigga mátkkošteamen USA:s 1939. Dan biilla geavahii ge Gonagasbearaš geassemánnu 7. beaivvi 1945, go sii maŋŋel 5 jagi báhtarusdilis máhcce fas Norgii. A1 fievrredii Gonagasbearraša Karl Johan gáhta mielde Šlohtii, hui stuora friddjavuođa ávvudeaddji olmmošeatnatvuođa čađa.

Fylkkamátki

Gonagas Harald ja Dronnet Sonja leaba Mátta-Trøndelágas vel golbma beaivvi. Gonagasbárra álggaha golmmabeaivásaš fylkkamátkki ihttin, ja soai geavaheaba Gonagasskiippa Norge. Guossástallan álgá Hitras ihttin iđđes.