Fokus: Áhpi, biras ja guoddevašvuohta

Gonagaslaš Allavuohta Ruvdnaprinseassa gidde fuomášumi dasa ahte dat maid mii beaivválaččat válljet dahkat, lea veahkkin dasa ahte juohkehaš mis bargá boahttevuođa birrasa suodjalemiin.

Ruvdnaprinseassa lea váldán badjelasas Gonagaslaš hoava birasbarggu jođihanovddasvástádusa, dakko bokte ahte jođihit siskkáldas birasjoavkku mas leat mielde bargit buot ossodagain. Dan ulbmil lea vuođđudit birasberošteaddji dihtomiela olles organisašuvdnii, vai álkibut máhttet válljet dan mii birrasii lea buoremus – sihke Hoava jođiheamis ja Gonagasbearraša almmolaš doaimmain.

Universála jurddašeapmi

Ruvdnaprinseassas lea nana jáhkku dasa ahte juohkehaš mis sáhttá beaivválaš eallima válljemiid bokte váikkuhit juoidá buori guvlui. Ii oktage sáhte buot nákcet, muhto buohkat sáhttet juoidá bargat!

Ruvdnaprinseassa Mette-Marit fitnamin Gávpotboandda luhtte Oslos. Govva: Terje Pedersen, NTB scanpix
Buot fáddásurggiin maiguin Ruvdnaprinseassa bargá, goziha son birasbeali. Dat guoská sihke design suorgái ja arkitektuvrii, teknologiija ovddideapmái, entreprenevra hoidui ja luonddugeavaheapmái.

Ábi dearvvašvuohta

Ruvdnaprinseassa Mette-Marit čuovvu hui áŋgirit ábi dearvvašvuođa – ja de earenoamážit mikroplastihkka nuoskkideami, mii lea duođalaš áitta ábi eallimii. Son lea máŋgga geardde leamaš mielde čorgemin mearragáttiid sihke almmolaččat ja maiddái priváhta oktavuođas – ja maiddái fárrolaga Majestehta Dronnet Sonjain.

Ruvdnaprinseassa vulggii Dronnet Sonja mielde čorget ruskkaid ovttas Sandefjord ruskačoggiiguin. Govven: Lise Åserud, NTB Scanpix
Norgii lea áhpi álo leamaš dehálaš dienasgáldu ja bargoaddi. Dat veahkeha maid arvvosmahttit ja addá ilu, ja danin dan lea dehálaš seailluhit buhtisin.

Buot dát áššit dahket ge dan ahte Ruvdnaprinseassas lea nu stuora beroštupmi ábi dearvvašvuhtii.