Polen 2005

Warszawa miessemánu 30. beaivvi

Ruvdnaprinsabárra bođii Polenii maŋŋelgaskabeaivvi. Norgga ambassadevra vuostáiválddii sudno, ja dan maŋŋil deaivvadii Ruvdnaprinsabárra presideanttain Aleksander Kwasniewski ja su eamidiin Jolanta Kwasniewskia presideantapalássas.

Miessemánu 31. beaivi

Ruvdnaprinsabárra álggahii beaivvi go rabaiga polska–norgga gealboforuma. Innovasjon Norge lea gealboforuma ovddasvástideaddji, ja dat galgá čalmmustahttit mátkeealáhusa ja ovttasbarggu mii guoská oadjebas dearvvaš bibmui ja dutkamii. Ealáhussáttagoddi mas ledje mielde 58 olbmo čuvvo dán guossástallama.

Maŋŋe čoahkkima polska várrestáhtaministariin, Izabela Jatuga-Nowacka, vulggii Ruvdnaprinsabárra viidáseappot Warsaw University of Technology Business School (WUTBS). Doppe soai guldaleigga polskalaččaid ja norgalaččaid sáhkavuoruid, ja de vulggiiga viidaseappot PSF Women’s Centrum Foundationii. Dát guovddáš ovttasbargá eaktodáhtolaš organisašuvnnaiguin fáttáin mat gusket dásseárvui, bearašveahkaválddálašvuhtii ja dearvvašvuhtii ja olmmošgávppašeapmái.

Maŋŋelgaskabeaivvi mátkkoštii Ruvdnaprinsabárra viidáseappot togain Krakowii, goas soai maŋŋelaš dan eahket leigga Thomas Dybdahl konsearttas Narodowy Stary Teatris.

Krakow geassemánu 1. beaivvi

Ruvdnaprinsabárra álggahii beaivvi guossástallamiin Ráđđeviesus, gos deaivvadeigga sátnejođiheddjiin Jacek Majchrowski. Go doppe gearggaiga, de soai vulggiiga Jagellonska universitehtii, gos ollu norgga studeanttat lohket medisiinna. Ruvdnaprinsabárra beasai maid oaidnit muhtun Kopernikus dutkandávviriid.

Maŋemus beaivvi beasai Ruvdnaprinsabárra gullat oanehaš čilgehusa Council of Europe and human rights birra. Olmmošvuoigatvuođaorganisašuvnna áirras Halina Niec muitalii makkár dilli dorvoohciciin ja báhtareddjiin lea Polenis. Dasto vulggii Ruvdnaprinsabárra togain fas ruovttoluotta Warszawai ja guđii Polena seamma maŋŋelgaskabeaivvi.