St. Olav Árvomearka

Gonagas Oscar ásahii St. Olav Árvomearkka 1847:s. Majestehta Gonagas lea árvomearkka Stuorameasttir. Dát Árvomearka lea ožžon namas min bassigonagasas, Bassi Olavis, ja dat lea juogaduvvon 5 luohkkái:

• Stuoraruossa
• Kommandøra mas lea násti
• Kommandøra
• 1. luohká Riddár
•  Riddár

Earret gonagasaide gullevaččaid ja stáhtaoaivámuččaid, de juogaduvvo St. Olav Árvomearka dál dušše norgalaččaide.

Árvomerkii gullet maid virjjit maid Gonagas sáhttá addit Stuoraruossa oamasteddjiide. Stuoraruossa virjjiiguin lea árvomearkka alimus dássi.

Hábmen

Árvomearka lea malteserruossa vilgesemálja gollis. Guovdu lea garrarukses globa man birra lea alit ja vilges riekkis. Globa ovdadbealde lea riikavearjju ledjon gollis, ja duogábealde leat Gonagas Oscar I válgasánit, «Ret og Sanhed». Dan njealji ruossagieđa gaskka manná gohtalaš O gollis man alde lea ruvdna. Kommandøra- ja riddárruossas lea šerres gonagasruvdna vel ruossa bajábealde.

Go muhtun dási St. Olav Árvomearka addojuvvo militeara bálvalusaide ánsun, de dan mearkkas leat guokte alitemálja miehki ruossalaga, vuolábealde gonagaslaš ruvnno mii lea ruossa alde.

Árvomearkka galgá guoddit garrarukses ivnnát báttis mas leat alit ja vilges ravddat.

Movt árvomearkka galgá guoddit

Riddárruossa galgá guoddit gurutbealde rattis ja kommandøraruossa báttiin čeabehis, ja stuoraruossa galgá guoddit oalgebáttis mii manná fitnjut olgeš oalggi badjel. Nissonolbmot guddet riddárruossa ja kommandøraruossa riddárbátti sløyfas gurutbealde rattis.

Árvomearka galgá máhcahuvvot Árvomearkakanselliai jus oažžu alit dási mearkka dahje jápmima maŋŋá.

Ohcan

Ohcan oažžut árvomearkka čállojuvvo Majestehta Gonagassii ja sáddejuvvo Fylkkamánne bokte. Čuovo čujuheaddji dás olgešbealde gos gávnnat dárkilit dieđuid.