Gonagaslaš čoakkáldagaid sekšuvnna

Sekšuvdna hálddaša dávviriid, vástida oktavuođaid ja gieđahallá gažaldagaid main jerrojuvvo oažžut dávviriid luoikkas museaid čájáhusaide. Gonagaslaš čoakkáldagain leat dávvirat main lea stuora mearkkašupmi Norgga historjjá ja kulturárbbi guoddin, ja danin bohtet ge dohko ollu gažaldagat dutkaninstitušuvnnain ja álbmogis minddár. Dološ stohpodávviriid ortnegisdoallan ja konserveren čađahuvvo ovttasráđiid Opmodathálddahusain.

Gonagaslaš opmodagaid čiŋaheapmi lea maid dán sekšuvnna ovddasvástádussuorgi.

Čoakkáldagat

Gonagaslaš dávvirvuorkái leat čohkkon dávvirat mat leat árbejuvvon, maid leat ožžon skeaŋkan dahje leat biergasat mat leat adnon Gonagasviesu jođiheapmái. Sekšuvnna ulbmil lea áimmahuššat daid dávviriid nu ahte dat bistet guhká, ja sekšuvdna bargá maid čohkket vel eanet dieđuid dan birra makkár kulturhistorjjálaš árvvuid čoakkáldat sisttisdoallá.

2002 álge systemáhtalaččat registreret govvadáidaga ja antikvitehtaid. Olles čoakkáldat registrerejuvvo systemáhtalaččat ja govvejuvvo digitála govvan. Barggu boađus galgá leat ahte sáhttá dievaslaččat oaidnit gonagaslaš čoakkáldagaid dáidda-ja kulturárvodávviriid elektruvnnalaččat, ja maiddái dan makkár čanastat dain lea Norgga monárkkaid historjái.

Doppe gávdnojit hui ollu govat main lea stuora historjjálaš árvu sihke našuvnnalaččat ja maiddái internašuvnnalaččat, ja 2007 álggahuvvui daid govaid registreren- ja digitaliserenbargu.

Gonagas Haakonis VII ja Dronnet Maudas lei stuora govvačoakkáldat mielde dalle go soai bođiiga Norgii, ja muđui lei Dronnet Maud dakkár gii liikui govvet astoáiggis. Su boarraseamos govvaalbum masa lea čohkken govaid maid ieš lea govven, lea 1880-logu loahpageahčen. Boarraseamos govat mat dán rádjái leat gávdnon, leat 1857 jagi rájes. Govvačoakkáldaga ođđasit oassi dokumentere gonagasbearraša almmolaš mátkkoštemiid dán riikkas ja olgoriikkain.

Dáiddačoakkáldaga sisdoalu sáhttá máittašit Gonagasviesu ruovttusiidduin. Maiddái Hoava govvaarkiivva govat almmuhuvvojit neahttasiidduin,sihke eaŋkiláššiid oktavuođas ja maiddái sierra historjjálaš govvaalbumis.

"Rabas šloahtta"

Rabas šloahtta čájeha álbmogii Gonagaslaš šloahta ja Oscarshall hervvoštallanšloahta geasiáigge. Rabas šloahtta lágida maid konsearttaid ja čájáhusaid, lea iešguđetlágan kulturdoaimmaid mieldelágideaddji ja jođiha Gonagaslaš šloahta ja Oscarshall museagávppiid. Juohke geasi bálkáhuvvojit sullii 25 ofelačča dien doibmii.

Lassin dasa ahte lágidit čájehemiid álbmogii, lea Rabas šloahtas maid ovddasvástádus čájehit daidda Gonagaslaš šloahta geat vuostáiváldet árvomedáljaid, ja sii leat maid veahkkin Gonagaslaš hovvii čájehit Šloahta earenoamážit bovdejuvvon gussiide birra jagi.

Dávjá leat Gonagaslaš čoakkáldagaid dávvirat ja govat dehálaš elementtat čájáhusain maid Rabas šloahtta lágida.

Rabas šloahta jođiha sierra kulturhoavda, guhte maid raportere šloahttahálddašeaddjái ja Rabas šloahta stivrii, gos Majestehta Dronnet lea gudni stivrajođiheaddji.